Rim papasi Falastin davlatini tan olishga chaqirdi

Bu haqda u Turkiyadan Livanga parvoz vaqtida jurnalistlar savollariga javob berdi.

Papaning aytishicha, Vatikan har ikki tomon bilan doʻst sifatida muloqot qilib, adolatli yechimga erishishda vositachilik qilishga tayyor.

«Hammamiz bilamizki, Isroil bu qarorni hozircha qabul qilmayapti. Ammo biz Falastin davlatini tan olish — mojaroni hal qilishning yagona toʻgʻri yoʻli deb hisoblaymiz», — dedi Lev XIV.

Bu Rim papasi saylangandan keyingi birinchi xorijiy tashrifi boʻlib, 27 noyabrda Turkiyada boshlangan va 2 dekabrda Livanda davom etmoqda.

Vatikan Falastinni avvaldan tan olgan

Vatikan Falastin davlatini 2015 yilda rasman tan olgan. Bu Fransisk papa taxtiga chiqqanidan ikki yil oʻtgach amalga oshirilgan. Maʼlumotlarga koʻra, Vatikan amalda 2013 yildan boshlab Falastinni tan olgan, oʻsha yili Falastin BMTda kuzatuvchi maqomini olgan.

Isroil esa oʻsha paytda Vatikanning mazkur qarori Yaqin Sharqdagi tinchlik jarayoniga yordam bermasligini bildirgan.

Isroil pozitsiyasi oʻzgarmagan

Isroil bosh vaziri Binyamin Netanyahu noyabr oyi oʻrtalarida Falastin davlatiga qarshi ekanini yana bir bor takrorlagan. U sentabr oyida BMT Bosh Assambleyasida ham Fransiya, Buyuk Britaniya, Avstraliya va Kanada tomonidan Falastinni tan olishni «sharmandali qaror» deb atagan edi.