“Озодлик флотилияси” фаоллари қийноқлар ва зўравонликлар ҳақида маълум қилди

“Global Sumud Flotilla” ташкилотчиларига кўра, халқаро сувларда қўлга олинган фаоллар бир неча кун давомида оғир шароитларда сақланган.

Флотилия иштирокчилари сўзларига кўра:

• улар калтакланган;
• уйқудан маҳрум қилинган;
• соатлаб тиззалаб туришга мажбурланган;
• электрошокер қўлланган;
• айрим ҳолатларда жинсий зўравонлик ҳолатлари ҳам кузатилган.

Ташкилотчилар маълум қилишича, камида 15 та жинсий зўравонлик ҳолати, жумладан, зўрлаш билан боғлиқ ҳолатлар қайд этилган.

Кўплаб фаоллар касалхонага ётқизилган

Озод қилинган иштирокчиларнинг айтишича, баъзи фаолларда:

• қовурға синиши;
• умуртқа поғонаси жароҳати;
• электрошокердан куйиш ва тан жароҳатлари аниқланган.

Шу сабабли уларнинг бир қисми касалхоналарга жойлаштирилган.

Европа давлатлари Исроилдан изоҳ сўрамоқда

Мазкур воқеа халқаро миқёсда катта резонанс уйғотди.

Хабарларга кўра, Италия прокуратураси:

• одам ўғрилаш;
• қийноқ;
• жисмоний зўравонлик

ҳолатлари бўйича тергов бошлаган.

Шунингдек, Германия ва Франция расмийлари ҳам ўз фуқаролари олган жароҳатлар юзасидан Исроил томонидан расмий тушунтириш талаб қилган.

Исроил айбловларни рад этмоқда

Исроил қамоқхона хизмати эса барча айбловларни асоссиз деб атаб, уларни рад этмоқда.

Расмий баёнотда маҳбусларга нисбатан қонун доирасида муносабатда бўлингани таъкидланган.

“Сумуд” флотилияси нима эди?

“Сумуд” ёки “Озодлик флотилияси” — Ғазо секторига инсонпарварлик ёрдамини етказиш ва блокадага эътибор қаратиш мақсадида ташкил этилган халқаро гуманитар ташаббус ҳисобланади.

“Сумуд” сўзи араб тилида “матонат”, “таслим бўлмаслик” маъносини англатади.