Россияда мигрантлар патенти автоматик бекор қилинади

Россия Ички ишлар вазирлиги маълум қилишича, патент асосида ишлайдиган хорижликлар ҳар ой жисмоний шахслар даромад солиғи (НДФЛ) бўйича аванс тўловини амалга ошириши керак. Тўлов амалга оширилмаса, патентнинг амал қилиши тўхтайди.

Агар мигрант учун солиқни бошқа шахс тўласа, тўлов маълумотларида унинг фамилияси, исми, отасининг исми, туғилган санаси ва ИНН рақами кўрсатилиши тавсия этилган. Бу тўловни ахборот тизимларида тўғри ҳисобга олиш учун зарур.

Патенти бекор қилинганига рози бўлмаган хорижий фуқаро қарорни чиқарган ҳудудий ички ишлар органига мурожаат қилиши ва НДФЛ тўланганини тасдиқловчи квитанцияларнинг асл нусхаларини тақдим этиши мумкин.

2027 йилдан талаблар яна кучаяди

Россияда 2027 йил 1 январдан хорижий ишчилар учун қатор янги талаблар жорий этилади. Жумладан, улар ўзини ва қарамоғидаги оила аъзоларини таъминлаш учун етарли даромадга эга эканини тасдиқлаши керак бўлади. Акс ҳолда патент ёки ишлаш рухсатномаси узайтирилмаслиги мумкин.

Шунингдек, вақтинча яшаш рухсати (РВП) ва доимий яшаш гувоҳномасини (ВНЖ) бекор қилиш асослари кенгайтирилади, мигрантларнинг фарзандлари бўйича янги қоидалар ва қўшимча НДФЛ аванс тўловлари жорий этилади.

2026 йил 1 октябрдан эса солиқ органлари мигрантларнинг даромадлари ҳақидаги маълумотларни Россия Ички ишлар вазирлигига узата бошлайди.