Трамп H-1B ишчи визаси учун 103 минг долларлик йиғимни доимий қилмоқчи

Бу ҳақда АҚШ Федерал реестрида эълон қилинган ҳужжатга таяниб, Reuters хабар берди.

Таклиф АҚШ Миллий хавфсизлик департаменти томонидан 24 август куни эълон қилинган. Агар қоида тасдиқланса, мазкур тўлов йиллик квота доирасидаги янги H-1B петицияларига қўлланади. Департамент ҳисоб-китобига кўра, йиллик 85 мингта шундай петиция бўлиши мумкин ва янги йиғим йилига қарийб 8,8 миллиард доллар тушум келтириши кутилмоқда.

Илгариги тўловдан фарқи нимада?

Трамп маъмурияти 2025 йил сентябрь ойида H-1B дастури бўйича айрим хорижий ишчилар учун АҚШга киришни 100 минг долларлик тўлов билан боғлаган эди. Ушбу чора 2026 йил сентябрда ўз кучини йўқотиши керак. Бироқ Массачусетс федерал суди 2026 йил июнь ойида тўловни жорий этишга асос бўлган маъмурий чорани бекор қилган. Ҳукумат бу қарор устидан апелляция берган.

Янги таклиф эса аввалги 100 минг долларлик тўловдан ҳуқуқий жиҳатдан фарқ қилади. DHS уни H-1B дастури доирасидаги алоҳида йиғим сифатида жорий этишни таклиф қилмоқда.

Кимларга татбиқ этилмайди?

103 265 долларлик янги йиғим барча H-1B аризаларига тааллуқли эмас. Таклифга кўра, у асосан йиллик квота доирасидаги янги H-1B петицияларига қўлланади.

Жумладан, АҚШда талаба визаси билан бўлиб, кейин H-1B мақомига ўтаётган чет эл фуқаролари ҳамда амалдаги H-1B мақомини узайтириш билан боғлиқ аризалар янги 103 265 долларлик тўловга киритилмайди.

H-1B дастури АҚШ компанияларига технология, муҳандислик, таълим ва бошқа ихтисослашган соҳаларда малакали хорижлик мутахассисларни ёллаш имконини беради. Дастур бўйича ҳар йили 65 мингта асосий виза ва АҚШда магистр ёки ундан юқори даража олганлар учун қўшимча 20 мингта виза ажратилади.

Ҳозирча 103 265 долларлик йиғим якуний жорий этилгани йўқ. Бу — таклиф қилинган қоида бўлиб, унинг кучга кириши учун белгиланган тартиб-таомиллардан ўтиши керак. Reuters маълумотига кўра, қоида йил охиригача якунланиши мумкин.