Россия биометрия текшируви орқали 69 мингга яқин хорижликни киритмади

Россияда хорижликларнинг биометрик маълумотларини йиғиш бўйича тажриба натижалари маълум қилинди.

Россия Ички ишлар вазирлиги маълумотига кўра, 2024 йил 1 декабрдан буён мамлакат чегарасида қарийб 14 млн нафар хорижликнинг биометрик маълумотлари текширилган. Уларнинг 68,9 минг нафари Россияга кириши тақиқланган шахслар рўйхатида экани аниқланган. 

Вазирликнинг таъкидлашича, биометрик идентификация чегара назорати вақтида шахсни фотосурати ва бармоқ излари орқали аниқлаш имконини беради.

Биометрия қаерда топширилади?

Тажриба 2024 йил 1 декабрда Москвадаги Шереметьево, Домодедово ва Жуковский аэропортлари, шунингдек, Оренбург вилоятидаги «Маштаково» автомобиль назорат-ўтказиш пунктида бошланган.

2025 йил 1 майдан дастурга Внуково аэропорти ҳам қўшилган. 

2026 йил июнь ойида эса яна 11 та чегара пункти биометрик маълумотларни йиғиш тизими билан жиҳозланган.

Янги пунктлар Санкт-Петербург, Новосибирск, Красноярск ва Екатеринбург шаҳарларида, шунингдек, Олтой ўлкаси ҳамда Иркутск, Қурган, Новосибирск, Саратов, Оренбург ва Омск вилоятларида жойлашган. 

Тизим нимани аниқлайди?

Россия ИИВга кўра, тизим нафақат хорижликларнинг биометрик маълумотларини йиғади, балки мамлакатдан чиқариб юборилган ёки Россияга кириши тақиқланган шахсларнинг шахсий маълумотларини ўзгартириб, қайта киришга уринишларини ҳам аниқлашга ёрдам беради. 

Шу тариқа, Россияда хорижликларнинг мамлакатга киришини назорат қилишда биометрик идентификациядан фойдаланиш доираси кенгайиб бормоқда.