Шимолий Корея АҚШ билан ярашиши мумкин, аммо Жанубий Кореяни “йўқ қилиш”га тайёр

Шу билан бирга, у Сеул билан муносабатлардаги дипломатик келишувга бўлган умидларни пучга чиқарди.

Шимолий Корея етакчиси Ким Чен Ин агар Пхенян хавфсизлиги хавф остида қолса, унинг мамлакати Жанубий Кореяни “бутунлай йўқ қилиши” мумкинлигини айтди. У Ишчилар партиясининг қурултойида Сеул билан мулоқот қилишдан воз кечганини такрорлади.

“Шимолий Корея ўзининг энг ашаддий душмани бўлган Жанубий Кореяга мутлақо алоқаси йўқ ва Жанубий Кореяни ҳеч қачон ўз ватандоши сифатида тан олмайди, — деб баёнот берди Ким. — Токи Жанубий Корея биз билан чегарадош бўлишдек геосиёсий шароитдан қутула олмас экан, хавфсиз яшашнинг ягона йўли — биз билан боғлиқ нарсалардан воз кечиб, Шимолий Кореяни ўз ҳолига қўйишдир”.

Сўнгги йилларда Ким Сеулга қарши кескин баёнотлар бериб, кореялараро дипломатияни рад этишини таъкидлаб келмоқда. Экспертларнинг фикрича, бу ҳарбий тўқнашувлардан дарак бермайди, аксинча, Пхенян ядровий арсенали ҳамда Москва ва Пекин билан алоқаларига таяниб, минтақадаги ўрнини мустаҳкамлашга қаратилган кенг кўламли саъй-ҳаракатларга интилмоқда.

Шунингдек, агар Вашингтон уни ядровий давлат сифатида тан олса, Ким мулоқот учун эшик очиқлигини билдирди.

Тахминларга қараганда, Доналд Трамп жорий йил охиридаги Хитойга ташрифи чоғида Ким Чен Ин билан учрашиши мумкин.

Шимолий Корея марказий ахборот агентлиги хабарига кўра, Ким ядрога эга қуролли кучларни мустаҳкамлаш учун янги тизимларини ишлаб чиқишга чақирган.

Буларга сув остидан учирилиши мумкин бўлган қитъалараро баллистик ракеталар, Жанубий Кореяга қаратилган артиллерия снарядлари каби тактик ядровий қуролларнинг кенгайтирилган арсенали киради.

Муаллиф: Исомиддин Жуманазаров