Туркия мактабларида “Марказий Осиё” ўрнига “Туркистон” атамаси қўлланилади

Бу ҳақда Туркия таълим вазири Юсуф Текин Истанбулда бўлиб ўтган тақдирлаш маросимида маълум қилди.

Вазирнинг айтишича, “Туркия асри маърифат модели” деб номланган янги таълим дастури доирасида мактаб дарсликларидан ҳукумат “ташқаридан тиқиштирилган” деб ҳисоблайдиган бир қатор атамалар чиқариб ташланган.

Жумладан:

• “Салиб юришлари” атамаси — “Салиб босқинлари”;
• “Географик кашфиётлар” — “Мустаъмлакачиликнинг бошланиши”;
• “Марказий Осиё” — “Туркистон” деб ўзгартирилган.

Шунингдек, Юсуф Текин “Эгей денгизи” атамаси ҳам тарихий жиҳатдан нотўғри эканини таъкидлаган.

“Лозанна шартномаси имзоланган вақтда ‘Эгей денгизи’ деган тушунча бўлмаган. Унинг тўғри номи — ‘Ороллар денгизи’. Бу атама Иккинчи жаҳон урушидан кейин, қисман Греция истаги билан оммалашган”, — деган вазир.

Унинг фикрича, бундай атамалар миллатнинг ўзлигини англашига бевосита таъсир кўрсатади.

“Бу ўзгаришлар майда нарсадек туюлиши мумкин, аммо улар миллий онгимизга тўғридан-тўғри таъсир қилади”, — дея таъкидлаган Текин.

Вазир сўзи якунида миллий руҳ ва тарихий онгни сақлаб қолиш муҳимлигини қайд этган.