Хитой «одамсимон» сунъий интеллект учун қатъий қоидалар жорий қилмоқда

Хитой регулятори «одамсимон» (антропоморф) сунъий интеллект — ҳиссиёт, фикрлаш ва мулоқотни тақлид қилувчи тизимлар учун янги қоидалар лойиҳасини ишлаб чиқди.

Ҳужжатда кўп босқичли назорат тизимини жорий этиш таклиф қилиниб, миллий хавфсизлик, руҳий саломатлик ёки ижтимоий тартибга зарар етказувчи контентни яратиш ва тарқатиш қатъиян тақиқланади.

Ҳужжатга кўра, миллий хавфсизликка таҳдид солувчи, миллий шаънни камситувчи, этник бирликка путур етказувчи, ноқонуний диний фаолиятни тарғиб қилувчи, иқтисодий ёки ижтимоий тартибни бузувчи миш-мишларни тарқатувчи контент, шунингдек, порнография, қимор ўйинлари, зўравонлик ёки жиноятга ундашни ўз ичига олган материаллар тақиқланади.

Лойиҳада фойдаланувчиларнинг руҳий ёки жисмоний саломатлигига зарар етказиши мумкин бўлган контентга алоҳида эътибор қаратилган. Хусусан, ўз-ўзига зарар етказишни рағбатлантириш, оғзаки ҳақоратлар ҳамда фойдаланувчининг қадр-қимматини камситувчи ҳиссий манипуляциялар қатъиян ман этилади.

Шунингдек, сунъий интеллект хизматларини кўрсатувчилар фойдаланувчиларга улар инсон билан эмас, балки машина билан мулоқот қилаётганини аниқ билдиришлари шарт. Хизматдан илк бор фойдаланилганда ёки қарамлик белгилари кузатилганда махсус огоҳлантиришлар (қалқиб чиқувчи ойналар) кўрсатилиши талаб этилади.

Жануби-ғарбий сиёсий фанлар ва ҳуқуқ университети ректори, Хитой юристлар жамияти вице-президенти Лин Вэйнинг таъкидлашича, антропоморф сунъий интеллект инсон ва машина ўртасидаги мулоқотни янада ҳиссий ва шахсийлаштирилган қилади. Унинг фикрича, бундай технологиялар тегишли даражада назорат қилинмаса, фуқаролар ҳуқуқларини бузиши ва ижтимоий тартибга салбий таъсир кўрсатиши мумкин.

Лин Вэйга кўра, мазкур лойиҳа миллий стратегик устуворликларга мос бўлиб, хавф-хатарларни бошқаришда тизимли ёндашувни шакллантиради. Ҳужжат хизматларни ишлаб чиқиш ва жорий этишнинг барча асосий босқичларида кўп қиррали назорат механизмларини жорий этишни назарда тутади. Бу эса Хитойда антропоморф сунъий интеллектнинг хавфсиз, адолатли ва барқарор ривожланишини таъминлашга қаратилган.