Xitoy «odamsimon» sunʼiy intellekt uchun qatʼiy qoidalar joriy qilmoqda

Xitoy regulyatori «odamsimon» (antropomorf) sunʼiy intellekt — hissiyot, fikrlash va muloqotni taqlid qiluvchi tizimlar uchun yangi qoidalar loyihasini ishlab chiqdi.

Hujjatda koʻp bosqichli nazorat tizimini joriy etish taklif qilinib, milliy xavfsizlik, ruhiy salomatlik yoki ijtimoiy tartibga zarar yetkazuvchi kontentni yaratish va tarqatish qatʼiyan taqiqlanadi.

Hujjatga koʻra, milliy xavfsizlikka tahdid soluvchi, milliy shaʼnni kamsituvchi, etnik birlikka putur yetkazuvchi, noqonuniy diniy faoliyatni targʻib qiluvchi, iqtisodiy yoki ijtimoiy tartibni buzuvchi mish-mishlarni tarqatuvchi kontent, shuningdek, pornografiya, qimor oʻyinlari, zoʻravonlik yoki jinoyatga undashni oʻz ichiga olgan materiallar taqiqlanadi.

Loyihada foydalanuvchilarning ruhiy yoki jismoniy salomatligiga zarar yetkazishi mumkin boʻlgan kontentga alohida eʼtibor qaratilgan. Xususan, oʻz-oʻziga zarar yetkazishni ragʻbatlantirish, ogʻzaki haqoratlar hamda foydalanuvchining qadr-qimmatini kamsituvchi hissiy manipulyatsiyalar qatʼiyan man etiladi.

Shuningdek, sunʼiy intellekt xizmatlarini koʻrsatuvchilar foydalanuvchilarga ular inson bilan emas, balki mashina bilan muloqot qilayotganini aniq bildirishlari shart. Xizmatdan ilk bor foydalanilganda yoki qaramlik belgilari kuzatilganda maxsus ogohlantirishlar (qalqib chiquvchi oynalar) koʻrsatilishi talab etiladi.

Janubi-gʻarbiy siyosiy fanlar va huquq universiteti rektori, Xitoy yuristlar jamiyati vitse-prezidenti Lin Veyning taʼkidlashicha, antropomorf sunʼiy intellekt inson va mashina oʻrtasidagi muloqotni yanada hissiy va shaxsiylashtirilgan qiladi. Uning fikricha, bunday texnologiyalar tegishli darajada nazorat qilinmasa, fuqarolar huquqlarini buzishi va ijtimoiy tartibga salbiy taʼsir koʻrsatishi mumkin.

Lin Veyga koʻra, mazkur loyiha milliy strategik ustuvorliklarga mos boʻlib, xavf-xatarlarni boshqarishda tizimli yondashuvni shakllantiradi. Hujjat xizmatlarni ishlab chiqish va joriy etishning barcha asosiy bosqichlarida koʻp qirrali nazorat mexanizmlarini joriy etishni nazarda tutadi. Bu esa Xitoyda antropomorf sunʼiy intellektning xavfsiz, adolatli va barqaror rivojlanishini taʼminlashga qaratilgan.