Хитой – Қирғизистон – Ўзбекистон темир йўлининг бутун йўналиши бўйича қурилиш ишлари бошланди

Торобаевнинг сўзларига кўра, Қирғизистон ҳудудидан ўтадиган темир йўлнинг узунлиги 304 километрдан ортиқни ташкил этади ва ушбу йўналиш бўйлаб қурилиш ишлари расман бошланган.

"Бугун, 30 июнь – Қирғизистон учун тарихий кун. Хитой – Қирғизистон – Ўзбекистон халқаро темир йўлининг бутун узунлиги бўйлаб тўлиқ кўламдаги қурилиш ишлари бошланди.

Жорий йилнинг 29 апрель куни ушбу темир йўлнинг асосий объектлари қурилишини бошлаш маросими ўтказилган эди. Бу лойиҳа фақат инфратузилмавий эмас, балки аҳоли ҳаёт сифатини ошириш, иқтисодий ўсишни таъминлаш ва минтақалар ҳамда халқлар ўртасидаги алоқаларни мустаҳкамлашга хизмат қилади. Шу муносабат билан тегишли давлат органлари раҳбарларига жойлардаги муаммоларни тезкор ҳал этиш ва уларнинг бориши ҳақида Президент Администрациясига ўз вақтида маълумот бериб боришни топшираман", — деди Торобаев.

Йиғилиш давомида қурилиш жараёнида юзага келган ўндан ортиқ масалалар муҳокама қилиниб, уларни ҳал этиш бўйича тегишли давлат органларига топшириқлар берилган.

Қайд этилишича, темир йўл йўлагининг тахминан 40 фоизи тоннеллар ва кўприклар орқали ўтади. Умумий лойиҳа доирасида 27 та туннель ва 41 та кўприк қурилиши режалаштирилган.

Қурилишни 2030 йилгача якунлаш режалаштирилган. Лойиҳанинг умумий қиймати 4,7 миллиард АҚШ доллари деб баҳоланмоқда.

Аввалроқ, 2024 йил 27 декабрда темир йўл қурилиши расмий равишда бошланган эди. Ўшанда Қирғизистон Президенти Садир Жапаров, Хитой Раиси Си Сзинпин ва Ўзбекистон Президенти Шавкат Мирзиёев чиқиш қилиб, лойиҳа бутун минтақа учун ниҳоятда муҳим эканини алоҳида таъкидлаган эдилар.