Хитой – Қирғизистон – Ўзбекистон темир йўлида муҳим туннель қуриб битказилди

Қирғизистонда Хитой – Қирғизистон – Ўзбекистон темир йўлининг биринчи 209,6 метр узунликдаги Кош-Добо Шимолий №2 туннели қуриб битказилди.

Темир йўл Қашқардан бошланиб, Қирғизистоннинг тоғли ҳудудлари орқали ўтади ва Ўзбекистоннинг Андижон шаҳригача етиб боради. Унинг умумий узунлиги 500 километрдан ошади, шундан қарийб 305 километри Қирғизистон ҳудудидан ўтади.

Лойиҳа доирасида Қирғизистон ҳудудида жами 29 та туннель қуриш режалаштирилган. Уларнинг умумий узунлиги 104,83 километрни ташкил этади. Шунингдек, темир йўл бўйлаб кўприклар, станциялар ва бошқа инфратузилмалар барпо этилмоқда.

Темир йўл фойдаланишга топширилгач, Хитойнинг Марказий Осиёга чиқиш имкониятлари кенгайиши ва Хитойдан Яқин Шарқ ҳамда Европага олиб борувчи муқобил қуруқлик савдо йўналиши шаклланиши кутилмоқда.

Халқаро таҳлилларда лойиҳа Россия ҳудудидан ўтувчи мавжуд йўналишларга муқобил коридор сифатида ҳам баҳоланмоқда.