Xitoy – Qirgʻiziston – Oʻzbekiston temir yoʻlining butun yoʻnalishi boʻyicha qurilish ishlari boshlandi

Torobayevning soʻzlariga koʻra, Qirgʻiziston hududidan oʻtadigan temir yoʻlning uzunligi 304 kilometrdan ortiqni tashkil etadi va ushbu yoʻnalish boʻylab qurilish ishlari rasman boshlangan.

"Bugun, 30 iyun – Qirgʻiziston uchun tarixiy kun. Xitoy – Qirgʻiziston – Oʻzbekiston xalqaro temir yoʻlining butun uzunligi boʻylab toʻliq koʻlamdagi qurilish ishlari boshlandi.

Joriy yilning 29 aprel kuni ushbu temir yoʻlning asosiy obʼektlari qurilishini boshlash marosimi oʻtkazilgan edi. Bu loyiha faqat infratuzilmaviy emas, balki aholi hayot sifatini oshirish, iqtisodiy oʻsishni taʼminlash va mintaqalar hamda xalqlar oʻrtasidagi aloqalarni mustahkamlashga xizmat qiladi. Shu munosabat bilan tegishli davlat organlari rahbarlariga joylardagi muammolarni tezkor hal etish va ularning borishi haqida Prezident Administratsiyasiga oʻz vaqtida maʼlumot berib borishni topshiraman", — dedi Torobayev.

Yigʻilish davomida qurilish jarayonida yuzaga kelgan oʻndan ortiq masalalar muhokama qilinib, ularni hal etish boʻyicha tegishli davlat organlariga topshiriqlar berilgan.

Qayd etilishicha, temir yoʻl yoʻlagining taxminan 40 foizi tonnellar va koʻpriklar orqali oʻtadi. Umumiy loyiha doirasida 27 ta tunnel va 41 ta koʻprik qurilishi rejalashtirilgan.

Qurilishni 2030 yilgacha yakunlash rejalashtirilgan. Loyihaning umumiy qiymati 4,7 milliard AQSh dollari deb baholanmoqda.

Avvalroq, 2024 yil 27 dekabrda temir yoʻl qurilishi rasmiy ravishda boshlangan edi. Oʻshanda Qirgʻiziston Prezidenti Sadir Japarov, Xitoy Raisi Si Szinpin va Oʻzbekiston Prezidenti Shavkat Mirziyoyev chiqish qilib, loyiha butun mintaqa uchun nihoyatda muhim ekanini alohida taʼkidlagan edilar.