Лондонда кўзи тўсилган одамнинг ҳайкали пайдо бўлди

Машҳур кўча рассоми Бенкси пайшанба куни Лондон марказида пайдо бўлган, ҳилпираётган байроқ юзини тўсиб қўйган ва пойдевордан тушаётган одам тасвирланган янги ҳайкал ўзининг ижоди эканлигини тасдиқлади.

Ўзининг Инстаграм саҳифасида эълон қилинган ҳажвий видеода Бенкси ҳайкалнинг ярим тунда қандай ўрнатилганидан лавҳалар кўрсатди.

Рассом бу ҳақда пост қўйишидан аввал ҳам, пойдевор асосига унинг имзоси туширилгани учун ҳайкални Бенксиники деб тахмин қилган маҳаллий аҳоли ва сайёҳлар уни кўриш учун тўпланишган эди.

Британия пойтахтида янги асар ҳақидаги гап-сўзлар авж олган бир пайтда, Бенксининг матбуот котиби АФП агентлигига шундай деди: “Рассом кеча тонг саҳарда рухсатсиз ўрнатилган ёдгорликни намоён қилди. У Палл-Малл кўчасидаги йўл ўртасидаги оролчада жойлашган бўлиб, Бенксининг айтишича, бу ерда озгина бўш жой бўлган”.

Ушбу ҳайкал 1901–1910-йилларда ҳукмронлик қилган қирол Эдвард ВИИ ва афсонавий ҳамшира Флоренс Найтингейл ҳайкаллари ҳамда Қрим уруши ёдгорлиги яқинида жойлашган.

Бенкси одатда ҳайкаллари билан танилган эмас. У кўпроқ биноларга пуркагич ёрдамида чизган расмлари билан машҳур бўлиб, унинг илк ижод намуналари 1990-йиллар бошида Англиянинг жануби-ғарбидаги она шаҳри Бристол кўчаларида пайдо бўлган.

Шундан сўнг Бенкси бутун дунёга танилди ва унинг асарлари ҳамда инсталлятсиялари кимошди савдоларида миллионлаб долларга сотилди. Рассомнинг кўча санъати кўпинча ўғрилар ва вандалларнинг нишонига айланади.

Ҳозиргача шахсини ошкор этмаган Бенкси ўз санъатини жамоат жойларида яширинча намойиш этишни “исёнкор ифода шакли” деб билган кўча рассомлари анъаналарининг бир қисмидир.

“Биз Бенксининг навбатдаги ҳайкалтарошлик асарини кўрганимиздан хурсандмиз... у шаҳарнинг жўшқин оммавий санъат саҳнасига қўшилган ёрқин ҳисса бўлди”, - янги ҳайкал пайдо бўлган ҳудудга масъул Вестминстер Кенгаши вакили.

Кенгашнинг қўшимча қилишича, ҳайкални ҳимоя қилиш бўйича дастлабки чоралари кўрилган, бироқ ҳозирча асар омма томоша қилиши ва завқланиши учун очиқ қолади.

Аввалроқ Бенкси тахаллусини олган кўча рассоми шахси ҳақида хабар бергандик.