Ўзбекистон туризмига қизиқиш 54 фоизга ошди — Expedia Group

Бу эса қизиқиш амалда саёҳат режаларига айланаётганини кўрсатади.

Expedia Group дунёдаги йирик онлайн туризм компанияларидан бири ҳисобланади. Унинг таркибига Expedia, Hotels.com, Vrbo, Travelocity, Orbitz, CheapTickets ва Hotwire каби платформалар киради. Компания хизматларидан ҳар йили 300 миллиондан ортиқ сайёҳ фойдаланади.

Маълумотларга кўра, июнь ойида Expedia Group орқали Ўзбекистонга расмийлаштирилган бронлар сони ўтган йилнинг шу даврига нисбатан 45,6 фоизга, сотиб олинган авиачипталар сони эса 23 фоизга ошган.

Ўзбекистонга энг кўп қизиқиш билдирган мамлакатлар қаторида АҚШ, Япония, Буюк Британия, Жанубий Корея, Германия ва Франция қайд этилган. Энг юқори ўсиш суръати АҚШ ва Японияда кузатилган.

Мамлакат ичида сайёҳлар энг кўп танлаётган шаҳарлар Тошкент, Самарқанд ва Бухоро бўлиб қолмоқда. Шу билан бирга, Хивага бўлган қизиқиш ҳам сезиларли даражада ортиб, шаҳарнинг умумий бронлар ҳажмидаги улуши кўпайган.

Дастлабки бронлар таҳлилига кўра, тасдиқланган сафарларнинг 82,9 фоизи 2026 йилнинг июль–сентябрь ойларига тўғри келади. Бу эса кузги сайёҳлик мавсумида ҳам талаб юқори бўлишини кўрсатмоқда.

Expedia Group ушбу ўсишни халқаро авиақатновлар географиясининг кенгайиши, визаларни расмийлаштириш тартибининг соддалаштирилиши ҳамда Ўзбекистоннинг халқаро туризм бозорида фаол тарғиб қилинаётгани билан изоҳлаган.