Ўзбекистонда I Халқаро ислом цивилизацияси форуми бошланмоқда

Жорий йилнинг 7–11 июль кунлари Тошкент, Самарқанд ва Термиз шаҳарларида "Ислом цивилизацияси: тинчлик, бағрикенглик ва илм-маърифат йўли" мавзусида I Халқаро ислом цивилизацияси форуми бўлиб ўтади. Бу ҳақда UzA маълум қилди.

Форум Ўзбекистондаги Ислом цивилизацияси маркази, Ўзбекистон Республикаси Дин ишлари бўйича қўмитаси, Имом Мотуридий, Имом Бухорий, Имом Термизий халқаро илмий-тадқиқот марказлари, Ўзбекистон мусулмонлари идораси, Ўзбекистон халқаро исломшунослик академияси ҳамда Ислом олами таълим, фан ва маданият масалалари бўйича ташкилоти – ICESCO ҳамкорлигида ташкил этилмоқда.

50 дан ортиқ давлатдан 300 га яқин меҳмон

Форумда 50 дан ортиқ мамлакатдан 300 га яқин хорижий меҳмон иштирок этиши кутилмоқда. 

I Халқаро ислом цивилизацияси форуми доирасида:

• 4 та халқаро конференция;
• 10 та ялпи мажлис;
• 15 та пленар йиғилиш;
• 6 та соҳавий шўъба ташкил этилади. 

Йирик илмий нашрлар ва китоблар тақдим этилади

Форум доирасида китоблар ва илмий нашрлар тақдимотига ҳам эътибор қаратилган. 

Хусусан:

• ICESCO билан ҳамкорликда тайёрланган "Ал-Жомиъ ас-Саҳиҳ" — "Уммат китоби" мавзусидаги халқаро конференция ҳамда тезислар тўплами;
• IRCICA билан ҳамкорликда нашр этилаётган "Шавкат Мирзиёев — маърифатпарвар йўлбошчи" китоб-альбоми;
• Россия мусулмонлари диний идораси билан ҳамкорликда чоп этилган Имом Термизийнинг "Шамоили Муҳаммадия" асарининг рус тилидаги академик нашри ва бошқа фундаментал лойиҳалар форумнинг энг муҳим қисмларидан бири бўлади.