Қорақалпоқ миллий таоми – «Балиқ қарма» патентланди

Адлия вазирлиги маълумотига кўра, географик кўрсаткич сифатида рўйхатдан ўтказилиши мазкур таомнинг номи ва анъанавий тайёрлаш технологиясини ҳуқуқий ҳимоя қилади, сифат стандартларини мустаҳкамлайди ҳамда Қорақалпоғистоннинг ҳудудий гастрономик брендини тарғиб этиш имкониятини кенгайтиради.

«Балиқ қарма» — Орол денгизи ва Амударё дельтасига яқин ҳудудларда шаклланган қадимий овқатланиш анъаналарига асосланган таом бўлиб, балиқчиликка суянган турмуш тарзи ва ўзига хос тайёрлаш усули билан ажралиб туради.

Таом таркибида пиширилган балиқ, шўрва, 1×1 ёки 2×2 см ўлчамдаги қуритилган хамир бўлаклари ҳамда сабзавотлар ишлатилади. Шўрванинг юзасидан олинган ёғ майда тўғралган пиёз устига қуйилиб, таомга хос таъм ва ҳидни таъминлайди.

Маълумот учун, географик кўрсаткич — бу маҳсулотнинг маълум ҳудудга хослиги ва унинг сифати, машҳурлиги ёки бошқа хусусиятлари ўша ҳудуднинг табиий, инсоний ва тарихий омиллари билан боғлиқ эканини ифодаловчи интеллектуал мулк туридир.