Apple iPhone патентини бузганлиги учун $5,7 миллиард тўлайди

Apple компанияси билдиришнома келганда ёки тугма босилганда сезиладиган тебранишларни таъминлаш учун Taction Technology компаниясининг патентланган технологиясидан фойдаланган.

Шу сабабли Apple компаниясига 5,7 миллиард доллардан ортиқ тўлов қилиш мажбурияти юклатилди.

Калифорния жанубий округи федерал судидаги ҳакамлар ҳайъати iPhone ишлаб чиқарувчиси Сан-Диегода жойлашган компанияга тегишли иккита патентни бузган деб топди.

«Ҳайъат Taction фойдасига қарор чиқаргани ва компаниянинг патент ҳуқуқларини тасдиқлаганидан хурсандмиз», — деди Taction компаниясининг адвокати Ленс Янг.

Мазкур ҳукм 2021 йилда бошланган суд жараёнининг якунидир. Ўшанда Taction илк бор Apple компаниясига қарши даъво аризаси билан мурожаат қилган. 2023 йилда федерал судья Apple Taction компаниясининг патентларини бузмаган, деган қарорга келган эди. Бироқ апелляция суди ўтган йили ишни қайта кўриб чиқиш учун тиклади.

«Taction компаниясининг инновациялари ва муваффақиятидан фойдаланиб, Apple Taction патентларини бузадиган қурилмаларни сотмоқда. Apple Taction томонидан патентланган ихтиролардан компаниянинг лицензияси ёки рухсатисиз фойдаланмоқда. Taction Apple томонидан содир этилган патент ҳуқуқлари бузилишини бартараф этиш учун ушбу даъвони киритди», — дейилади Taction томонидан дастлаб тақдим этилган 31 саҳифалик даъво аризасида.

Бироқ ҳакамлар ҳайъати Apple патентларни қасддан бузмаган деб топди.

Apple қарор устидан шикоят қилишни режалаштираётганини маълум қилди.

«Apple’нинг Taptic Engine технологияси Taction технологиясидан тубдан фарқ қилади. Буни суд жараёнида Taction’нинг ўзи ҳам Apple маҳсулотларини синаб кўрганида тасдиқлади», — дея жавоб берди Apple.

Ҳукм компания учун ҳал қилувчи паллада, юқори тизимдаги ўзгаришлар фонида эълон қилинди. Технологик гигант ўзининг сунъий интеллект маҳсулотларини ишлаб чиқаришда бошқа йирик компаниялардан ортда қолаётган бир пайтда раҳбарият ўзгарди.

Душанба куни савдолар бошланиши билан Apple акциялари тахминан икки фоизга пасайди.