Qoraqalpoq milliy taomi – «Baliq qarma» patentlandi

Adliya vazirligi maʼlumotiga koʻra, geografik koʻrsatkich sifatida roʻyxatdan oʻtkazilishi mazkur taomning nomi va anʼanaviy tayyorlash texnologiyasini huquqiy himoya qiladi, sifat standartlarini mustahkamlaydi hamda Qoraqalpogʻistonning hududiy gastronomik brendini targʻib etish imkoniyatini kengaytiradi.

«Baliq qarma» — Orol dengizi va Amudaryo deltasiga yaqin hududlarda shakllangan qadimiy ovqatlanish anʼanalariga asoslangan taom boʻlib, baliqchilikka suyangan turmush tarzi va oʻziga xos tayyorlash usuli bilan ajralib turadi.

Taom tarkibida pishirilgan baliq, shoʻrva, 1×1 yoki 2×2 sm oʻlchamdagi quritilgan xamir boʻlaklari hamda sabzavotlar ishlatiladi. Shoʻrvaning yuzasidan olingan yogʻ mayda toʻgʻralgan piyoz ustiga quyilib, taomga xos taʼm va hidni taʼminlaydi.

Maʼlumot uchun, geografik koʻrsatkich — bu mahsulotning maʼlum hududga xosligi va uning sifati, mashhurligi yoki boshqa xususiyatlari oʻsha hududning tabiiy, insoniy va tarixiy omillari bilan bogʻliq ekanini ifodalovchi intellektual mulk turidir.