Россия Украина–Полша чегараси яқинида АЁҚШ ва йўловчи поездига дронлар билан зарба берди

Украина ОАВлари тарқатган фото ва видеоларда АЁҚШда кучли ёнғин бошлангани, яқин атрофда турган юк машиналари ҳам ёниб кетгани кўринади. «Суспільне» маълумотига кўра, икки нафар ҳайдовчи жабрланган. Шунингдек, супермаркет биносига ҳам зарар етган.

Россия қўшинлари Полша чегарасидан тахминан икки километр узоқликдаги йўловчи поезди локомотивига ҳам зарба берган. «Укрзалізниця»нинг билдиришича, поезд бригадаси ҳужум хавфи ҳақида олдиндан огоҳлантирилгани сабаб қурбонлар бўлмаган.

Украина темир йўллари раҳбари Александр Перцовский Россия қўшинлари иккинчи кун давомида депо, станциялар ва ҳаракат таркибини нишонга олаётганини айтган.
Ҳужумлар оқибатида мамлакат бўйлаб поездлар ҳаракат жадвали бузилган. Айрим рейслар 9–10 соатга, Конотоп–Жмеринка йўналишидаги поезд эса 18 соатдан ортиқ кечикаётгани хабар қилинган.

Украина ташқи ишлар вазири Андрей Сибига чегара яқинидаги зарбаларни «ЕИ ва НАТО эшигига етиб келган террор» деб атаб, Европа давлатларини Россияга нисбатан санкцияларни кучайтиришга чақирган.
Россия Мудофаа вазирлиги эса Украина ғарбида «Европа давлатларидан ҳарбий юкларни ташишни таъминлайдиган темир йўл инфратузилмаси объектлари»га зарбалар берилганини маълум қилган.