Мирзиёев Гурбангули Муҳаммедов билан учрашди

Учрашувда Ўзбекистон–Туркманистон ўртасидаги стратегик шерикликни мустаҳкамлаш, савдо-иқтисодий ҳамкорликни кенгайтириш, энергетика, транспорт, қишлоқ ва сув хўжалиги соҳаларида қўшма лойиҳаларни амалга ошириш масалалари муҳокама қилинган.

Давлат раҳбарлари икки мамлакат ўртасидаги савдо ҳажми йил бошидан бери 700 миллион долларни ташкил этганини қайд этган. Февраль ойидан бошлаб эркин савдо режими амал қилмоқда, пойтахтларда савдо уйлари фаолият юритмоқда. Шунингдек, жорий йилда “Шовот – Тошовуз” савдо зонасини ишга тушириш режалаштирилмоқда.

Музокараларда бўлажак олий даражадаги учрашувларга тайёргарлик, ҳукуматлараро комиссиялар, Ишбилармонлар кенгаши йиғилишлари ва маданий тадбирларнинг самарали ўтказилиши муҳимлиги таъкидланган.

Суҳбат аввалида Гурбангули Бердимуҳамедов президент Мирзиёевга Туркманистон президенти Сердар Бердимуҳамедовнинг саломи ва эзгу тилакларини етказган. Ўзбекистон президенти эса туркман халқини яқинда Авазада бўлиб ўтган БМТ конференциясини муваффақиятли ўтказгани билан табриклаган.

Шунингдек, томонлар Марказий Осиё давлатлари раҳбарларининг бўлажак Маслаҳат учрашуви ва “Озарбайжон – Туркманистон – Ўзбекистон” форматидаги уч томонлама мулоқот аҳамиятига ҳам тўхталганлар.