Болаларга зўравонлик қилганларга педагогик фаолият тақиқланади

Шунингдек, таълим ташкилотида болани камситиш ёки хўрлаш учун маъмурий жарима белгиланади.

"Болаларни ижтимоий ҳимоя қилиш тизими такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида"ги Қонун билан болаларнинг ҳуқуқ ва манфаатларини ҳимоя қилишга қаратилган қатор янги тартиблар белгиланди.

Ижтимоий ҳимоя миллий агентлиги маълумотларга кўра, бугунги кунда мамлакат аҳолисининг 28 фоизини, яъни 10,9 миллион нафарни болалар ташкил этади. Қонун билан боланинг ҳуқуқ ва манфаатларини устувор қўйиш, уларни зўравонлик ва тазйиқдан ҳимоя қилиш ҳамда ота-она қарамоғидан маҳрум бўлган болаларга ўз вақтида ижтимоий хизмат кўрсатиш механизмлари кучайтирилмоқда.

Бунда таълим ташкилотида болага нисбатан жисмоний зўравонлик содир этиш, уни камситиш ёки хўрлаш учун эса 440 минг сўмдан 2,06 миллион сўмгача маъмурий жарима белгиланади.

Шунингдек, болаларга нисбатан жисмоний ёки руҳий зўравонлик содир этганлик учун жавобгарликка тортилган шахсга бир йил давомида мактабгача, умумий ўрта, ўрта махсус, профессионал таълим ташкилотлари ҳамда болалар учун қўшимча таълим ташкилотларида педагогик фаолият билан шуғулланиш тақиқланади.

Бундан ташқари, болаларга оид жиноят ишларини сайёр судларда кўриш тақиқланади. Болани фарзандликка бериш ёки олиш, шунингдек, васийлик ёки ҳомийликка беришга оид аризаларда имзонинг ҳақиқийлигини шаҳодатлаш бўйича мурожаат қилинганда, нотариуслар маълумотларни "Инсон" марказларига тақдим этиши шарт бўлади.

Давлат ёки нодавлат муассасаларининг тўлиқ таъминотида бўлган вояга етмаган болага алимент тўлаши шарт бўлган ота ёки онани моддий аҳволидан келиб чиқиб алимент тўлашдан озод қилиш амалиёти бекор қилинади.