Орол денгизи ҳавзасида 40 дан зиёд экологик лойиҳа амалга оширилмоқда

Тадбирга Қозоғистон Бош вазири ўринбосари Қанат Бозумбаев, Ўзбекистон Президенти маслаҳатчиси Шуҳрат Ғаниев, Тожикистон Бош вазири ўринбосари Сулаймон Зиёзода, Туркманистон қишлоқ хўжалиги вазири Чорёр Четиев, ҳамда Қирғиз Республикаси Сув хўжалиги хизматининг вакили Абдибой Жайлобоев иштирок этди.

Йиғилишда Орол денгизи ва унинг ҳавзасидаги экологик вазият нафақат минтақавий, балки глобал аҳамиятга эга масалага айлангани таъкидланди.

“Бу барқарор ривожланиш, озиқ-овқат ва энергия хавфсизлиги, миллионлаб инсонларнинг турмуш сифати билан боғлиқ глобал экологик кун тартибининг бир қисмидир”, — деди Қанат Бозумбаев.

Ҳозирда Орол денгизи ҳавзасида 42 та экологик лойиҳа амалга оширилмоқда. Шунингдек, Жаҳон банки кўмагида икки минтақавий грант лойиҳасини ишга тушириш масаласи кўриб чиқилмоқда.

Томонлар келаси йил апрель ойида бўлиб ўтадиган Оролни қутқариш халқаро жамғармаси таъсисчи давлатлари раҳбарлари кенгаши йиғилишига тайёргарликни муҳокама қилдилар.

Шу билан бирга, йиғилишда “26 март — Халқаро Орол, Амударё ва Сирдарё бўйи куни” деб эълон қилиш таклифи ҳам маъқулланди.

Муҳокамалар якунида Жамғарма бошқарув кенгаши қарорлари имзоланди.