Orol dengizi havzasida 40 dan ziyod ekologik loyiha amalga oshirilmoqda

Tadbirga Qozogʻiston Bosh vaziri oʻrinbosari Qanat Bozumbayev, Oʻzbekiston Prezidenti maslahatchisi Shuhrat Gʻaniyev, Tojikiston Bosh vaziri oʻrinbosari Sulaymon Ziyozoda, Turkmaniston qishloq xoʻjaligi vaziri Choryor Chetiyev, hamda Qirgʻiz Respublikasi Suv xoʻjaligi xizmatining vakili Abdiboy Jayloboyev ishtirok etdi.

Yigʻilishda Orol dengizi va uning havzasidagi ekologik vaziyat nafaqat mintaqaviy, balki global ahamiyatga ega masalaga aylangani taʼkidlandi.

“Bu barqaror rivojlanish, oziq-ovqat va energiya xavfsizligi, millionlab insonlarning turmush sifati bilan bogʻliq global ekologik kun tartibining bir qismidir”, — dedi Qanat Bozumbayev.

Hozirda Orol dengizi havzasida 42 ta ekologik loyiha amalga oshirilmoqda. Shuningdek, Jahon banki koʻmagida ikki mintaqaviy grant loyihasini ishga tushirish masalasi koʻrib chiqilmoqda.

Tomonlar kelasi yil aprel oyida boʻlib oʻtadigan Orolni qutqarish xalqaro jamgʻarmasi taʼsischi davlatlari rahbarlari kengashi yigʻilishiga tayyorgarlikni muhokama qildilar.

Shu bilan birga, yigʻilishda “26 mart — Xalqaro Orol, Amudaryo va Sirdaryo boʻyi kuni” deb eʼlon qilish taklifi ham maʼqullandi.

Muhokamalar yakunida Jamgʻarma boshqaruv kengashi qarorlari imzolandi.