Бухорода 508 миллион сўмлик қалбаки дори воситалари аниқланди

Вилоят божхона бошқармаси Контрабандага қарши курашиш бўлими томонидан тезкор тадбир ўтказилди.

Унда назорат остига олинган фуқаро Бухоро шаҳридаги хусусий дорихоналардан бири яқинида ҳеч қандай тегишли ҳужжатларга эга бўлмаган икки қути “Бусерелин-Депо” номли контрафакт дори воситасини 2 миллион 900 минг сўм эвазига сотаётган вақтида қўлга олинди.

Шундан сўнг мазкур фуқаро фаолияти билан боғлиқ бўлган дорихона кўздан кечирилди. Натижада савдо шохобчасида тегишли ҳужжатларсиз сақланаётган ва сотувга тайёрланган умумий қиймати 508 миллион сўмлик 121 турдаги 13 минг 641 дона контрафакт дори воситалари мавжудлиги аниқланди.

Бундай дори воситаларининг назоратсиз тарзда аҳолига сотилиши инсон саломатлиги учун жиддий хавф туғдиради.

Маълум қилинишича, жорий йил бошидан буён Бухоро вилояти божхона бошқармаси томонидан 26 та ҳолатда қиймати 8 миллиард 860 миллион сўмлик контрафакт дори воситалари ва тиббиёт буюмларининг ноқонуний айланмасига чек қўйилган.