Тошкентда 100 километрлик пулли ҳалқа йўли қурилиши мумкин

Хитой Халқ Республикасига расмий ташриф доирасида Тошкент шаҳар ҳокими Шавкат Умурзаков бошчилигидаги шаҳар ҳокимлиги делегацияси “China Railway Construction Corporation” компанияси раҳбарияти билан учрашув ўтказди. 

Музокаралар давомида томонлар қуйидаги йўналишларда ҳамкорлик истиқболларини муҳокама қилинди:

-       Тошкент шаҳрини комплекс реновация қилиш;

-       шаҳар инфратузилмасини модернизациялаш;

-      шаҳарсозлик ва экология соҳаларига замонавий ечимларни жорий этиш.

Тошкент шаҳар ҳокими компанияга реновация ҳудудларидаги лойиҳаларни амалга оширишда, шунингдек, замонавий экологик стандартлар ва технологияларни қўллаган ҳолда қурилиш ва маиший чиқиндиларни қайта ишлайдиган ихтисослаштирилган полигон қуришда иштирок этиш имкониятини кўриб чиқишни таклиф этди. 

Бундан ташқари, учрашувда пойтахт транспорт инфратузилмасини ривожлантириш масалаларига алоҳида эътибор қаратилди.

Томонлар Тошкент шаҳрида қўшимча пулли автомобиль йўлларини қуриш лойиҳаларини, жумладан:

• узунлиги қарийб 100 километр бўлган ҳалқа пулли йўли;
• янги халқаро аэропорт йўналишида шаҳарнинг марказий қисмидан ўтувчи янги пулли магистраль қурилишини амалга ошириш истиқболларини муҳокама қилди. 

Шунингдек, музокаралар доирасида “Чина Railway Construction Corporation” компаниясининг тажриба ва салоҳиятини жалб қилган ҳолда ижтимоий инфратузилма объектлари, жумладан, замонавий мактаблар, болалар боғчалари, тиббиёт муассасалари ва бошқа ижтимоий аҳамиятга эга объектлар қуриш масалалари кўриб чиқилди.