Ўзбекистонда хорижлик талабалар сони ортиб бормоқда

Миллий статистика қўмитаси маълумотларига кўра, 2025 йил январь–август ойларида 14 минг 216 нафар хорижий фуқаро Ўзбекистон олий таълим муассасаларида ўқишни бошлаган. Бу кўрсаткич ўтган йилга нисбатан 28,8 фоизга юқори.

Энг кўп талабалар Туркманистон (4 603) ва Ҳиндистондан (3 477) келган. Шунингдек, Тожикистон (1 392); Хитой (710); Покистон (700); Жанубий Корея (553)дан ҳам ёшлар таҳсил олмоқда. Рўйхатда АҚШ (319); Буюк Британия (110); Жанубий Африка Республикаси (98)дан келган талабалар ҳам бор.

Мутасаддиларнинг таъкидлашича, мазкур кўрсаткичлар Ўзбекистонда таълим сифати ва халқаро ҳамкорлик имкониятлари ортиб бораётганидан далолатдир. Шу билан бирга, қўшни давлатлар билан географик ва маданий яқинлик, шунингдек, Ҳиндистон, Покистон ва Жанубий Корея каби мамлакатлар ёшларининг қизиқиши ҳам талабалар оқимининг ўсишига туртки бўлмоқда.