Oʻzbekistonda xorijlik talabalar soni ortib bormoqda

Milliy statistika qoʻmitasi maʼlumotlariga koʻra, 2025 yil yanvar–avgust oylarida 14 ming 216 nafar xorijiy fuqaro Oʻzbekiston oliy taʼlim muassasalarida oʻqishni boshlagan. Bu koʻrsatkich oʻtgan yilga nisbatan 28,8 foizga yuqori.

Eng koʻp talabalar Turkmaniston (4 603) va Hindistondan (3 477) kelgan. Shuningdek, Tojikiston (1 392); Xitoy (710); Pokiston (700); Janubiy Koreya (553)dan ham yoshlar tahsil olmoqda. Roʻyxatda AQSh (319); Buyuk Britaniya (110); Janubiy Afrika Respublikasi (98)dan kelgan talabalar ham bor.

Mutasaddilarning taʼkidlashicha, mazkur koʻrsatkichlar Oʻzbekistonda taʼlim sifati va xalqaro hamkorlik imkoniyatlari ortib borayotganidan dalolatdir. Shu bilan birga, qoʻshni davlatlar bilan geografik va madaniy yaqinlik, shuningdek, Hindiston, Pokiston va Janubiy Koreya kabi mamlakatlar yoshlarining qiziqishi ham talabalar oqimining oʻsishiga turtki boʻlmoqda.