Перудаги жаҳон чемпионатининг иккинчи кун баҳслари якунланди

400 метрга югуриш дастурида Жонбиби Ҳукмова дастлабки саралаш босқичини муваффақиятли якунлади. 54.12 сония билан ўзининг шахсий рекордини янгилаган Ҳукмова ярим финалга йўл олди. Бироқ унда атлет қайд этган 54.87 сонияли натижа финал йўлланмаси учун камлик қилди. Аммо Жонбиби Ҳукмова ярим финалда иштирок этган осиёлик ягона атлет бўлди.

Уч ҳатлаб сакраш дастурида Шарифа Давронова 13.29 метр билан катта қийинчиликсиз финал йўлланмасига эга  бўлди. Афсуски, ушбу дастурда Хушноза Шавкатова 12.79 метр билан 15-кўрсаткични қайд этди ва медаллар учун курашиш имкониятини йўқотди. Энди Давронова 31 август куни иккинчи чемпионлик учун курашни давом эттиради.

Бугун Ўзбекистон терма жамоасининг яна бир аъзолари Барнохон Сайфуллаева баландликка сакраш, Нодир Норбоев эса ўнкурашнинг 5 та дастурида ўз омадини синаб кўришади.