Шавкат Мирзиёев Никол Пашинян билан телефон орқали мулоқот қилди

Ўзбекистон Республикаси Президенти Шавкат Мирзиёев 11 сентябрь куни Арманистон Республикаси Бош вазири Никол Пашинян билан телефон орқали мулоқот қилди. Бу ҳақда Президент матбуот хизмати хабар берди.

Суҳбат давомида Ўзбекистон ва Арманистон ўртасидаги муносабатларни, энг аввало, савдо-иқтисодий ва инвестиция соҳаларида янада ривожлантиришнинг долзарб масалалари муҳокама қилинди.

Мулоқотда саноат кооперацияси бўйича янги қўшма лойиҳаларни ишлаб чиқиш муҳим экани алоҳида қайд этилди. Шунингдек, Марказий Осиё ва Жанубий Кавказ минтақаларини боғлайдиган логистика ва транспорт йўлакларини ривожлантириш орқали ўзаро боғлиқликни мустаҳкамлаш зарурлиги таъкидланди.

Президент Шавкат Мирзиёев минтақавий барқарорлик ва изчил тараққиёт учун мустаҳкам асос бўладиган Тинчлик шартномасини тез фурсатда имзолаш борасидаги саъй-ҳаракатларни юксак баҳолади.

Телефон мулоқоти давомида икки ва кўп томонлама ҳамкорлик доирасидаги, жумладан, Бирлашган Миллатлар Ташкилоти ҳамда Мустақил Давлатлар Ҳамдўстлиги доирасидаги тадбирлар режаси ҳам кўриб чиқилди.

Ҳасанбой ОЧУН