Самарқандда автомобиль бошқарган 7-синф ўқувчиси ҳалок бўлди

"Kun.uz" нашрига кўра, ЙТҲ Булунғур тумани Оқтош маҳалласи ҳудудидан ўтувчи 4R-238 автомобиль йўлида юз берган. Шу йўналиш бўйлаб ҳаракатланиб келаётган Жигули машинаси бошқарувида бўлган 7-синф ўқувчиси машина бошқарувини йўқотган. 

Ўқувчининг мазкур эҳтиётсизлиги оқибатида машина йўл четидаги ариққа ағдарилиб кетган. Бунинг ортидан бола оғир тан жароҳати олиб шифохонага ётқизилган. Бироқ у 17 октябрь куни шифокорларнинг муолажасига қарамасдан шифохонада вафот этган.

"Юқоридаги ҳолат юзасидан Булунғур тумани ИИБ томонидан жиноят иши қўзғатилган. Ҳозирда дастлабки суриштирув ҳаракатлари олиб борилмоқда", дейилади манбада.

Вилоят Йўл ҳаракати хавфсизлиги бошқармасининг ахборот хизмати хабарида ЙҲХБ мутасаддилари юқоридаги ҳолатларнинг олдини олиш мақсадида Булунғур туманидаги марҳум ўқувчи таълим оладиган мактабда ота-оналар ва ўқувчилар иштирокида муҳокама йиғилиши ўтказган.

Эслатиб ўтамиз, аввалроқ Тошкент шаҳрида "Lacetti" автомашинаси икки нафар пиёдани уриб, йўл-транспорт ҳодисасини содир этганди. Ушбу ЙТҲ оқибатида уч киши вафот этган.