Ноқонуний «Умра» зиёратини ташкил этишга уринган шахслар ушланди

Самарқанд ва Наманган вилоятларида фуқароларни ноқонуний Умра зиёратига юборишни ваъда қилиб, улардан пул талаб қилган икки шахс ушланди. Бу ҳақда ДХХ хабар бермоқда. 

Самарқанд шаҳрида фаолият юритувчи оилавий корхона вакили тегишли ваколатга эга бўлмаган ҳолда фуқарони ва унинг икки нафар қариндошини Саудия Арабистонига «Умра» зиёратига юборишни ваъда қилган. У сафарни ташкил этиш ва зиёрат амалларини тўлиқ бажариш учун шароит яратиб бериш эвазига 3 450 АҚШ доллари талаб қилган.

У талаб қилинган маблағдан 3 000 долларни олган вақтида Давлат хавфсизлик хизмати (ДХХ) ва Ички ишлар бошқармаси ходимлари томонидан ашёвий далиллар билан ушланган.

Ҳозирда унга нисбатан жиноят иши қўзғатилиб, дастлабки тергов ҳаракатлари олиб борилмоқда.

Наманганда ҳам шундай ҳолат аниқланди

Наманган туманида фаолият юритувчи масъулияти чекланган жамият раҳбари Учқўрғон туманида яшовчи фуқарони ноқонуний равишда «Умра» зиёратига юбориш эвазига 1 350 АҚШ доллари талаб қилган.

У олдиндан 1 200 долларни олган вақтида ДХХ ва ички ишлар органлари ходимлари томонидан ашёвий далиллар билан ушланган.

Мазкур ҳолат юзасидан ҳозирда терговга қадар текширув ҳаракатлари олиб борилмоқда.

Муаллиф: Ҳасанбой ОЧУН