Самарқандда аёл фарзандини ҳожатхонада дунёга келтирди

Унга кўра, шифохона ҳожатхонасидан чақалоқ йиғисини эшитган шифокор шу атрофдаги ички ишлар ходимларига мурожаат қилган. Шундан кейин ходимлар келиб, зудлик билан ён томондан хандақ қазиб, икки соат давомида чақалоқни олиб чиқишга уринган. 

Чақалоқни қутқариб қолган инспектор Сардор Сафаров ҳодисани эслар экан, уни сақлаб қолиш учун фақатгина бир ўзи эмас, балки бошқа ходимлар ҳам биргаликда ҳаракат қилганини айтиб ўтди.

"Шу чақалоқнинг умрини сақлаб қолиш учун қўлимизга нима илашса, шуни олдик. Туйнук ковларканмиз, ҳар ковлаганимизда чақалоқ овози эшитилмай қолар эди. Кейин бу ерда ҳамма ходимлар биргаликда жон койитиб ковлашди. Ер қаттиқ, тоғли ҳудуд, бир амаллаб ковладик. Ҳамма ходимлар у ерда киришга тайёр турган эди, фақат туйнук сал кичикроқ бўлганлиги учун биринчи бўлиб ўзим кирдим", дейди у.

Унинг қўшимча қилишича, чуқурда чақалоқ ёнбошланиб, оёқ-қўллари қимирламай қолган. Чуқурдан чиқарилганидан кейин биринчи тиббий ёрдам кўрсатиш учун ҳамшираларга, шифокорларга берилган. 

1 март куни соат 12:00 лар атрофида Нуробод тумани марказий шифохонасига олиб келинган чақалоқ шифокорларнинг доимий назоратига олинган. У ҳозирда интенсив хонада сақланмоқда. 

"Келганда жуда ҳам бола музлаб кетган эди, ҳозирда аҳволда анча яхши. Ҳозир боланинг онаси ҳам ўзини анча яхши ҳис қилиб, бизни берган саволларимизга яхши жавоб беряпти", дейди шифокор Фармон Қўшмуродов.

Аммо ҳолатнинг ажабланарли томони шундаки, она бешинчи фарзандига ҳомиладор бўлганлигини ўзи билмаган.

"Ҳомиладор бўлганимни билмайман, рости-да. Ҳомиладорлик даврида ҳам токсикоз бўлмадим. Шу давр ичида поликлиникага борганим ёқ, уйда бўлдим", дейди аёл.