Беларусь 25 нафар сиёсий маҳбусни озод қилди

Беларусь ҳукумати 25 нафар маҳбусни «яхши ният рамзи» сифатида озод қилди. Бу ҳақда АҚШ президентининг Беларусь бўйича махсус вакили Жон Коул маълум қилди.

Келишувга кўра, АҚШ «Лакокраска» ва «Беллесбумпром» компанияларига нисбатан санкцияларни олиб ташлайди.

Коулнинг айтишича, томонлар Минскдаги музокаралар давомида «оралиқ келишув»га эришган. Қолган масалалар бўйича музокаралар давом эттирилади.

Озод этилганлар орасида Tut.by нашри бош директори Людмила Чекина ҳамда Tor Band гуруҳи аъзолари Евгений Бурло, Дмитрий Головач ва Андрей Яремчик борлиги хабар қилинди.

Коул 15 сентябрь куни Минскда Беларусь раҳбари Александр Лукашенко билан учрашган. У музокаралардан кейин яна Беларусьга боришини ва кейинги босқичда яна юзлаб маҳбусларни озод қилиш бўйича келишувга эришишга умид қилаётганини айтган.

АҚШ ва Беларусь ўртасида маҳбусларни озод қилиш ва санкцияларни юмшатиш масалалари бўйича музокаралар бир неча ойдан бери давом этмоқда. RFE/RL маълумотига кўра, аввалги музокаралар натижасида ҳам юзлаб одамлар озод қилинган.

Коулнинг сўзларига кўра, қолган масалалар бўйича келишувга эришилса, кейинчалик яна маҳбуслар озод қилиниши ва Беларусь компанияларига нисбатан санкциялар юмшатилиши мумкин.