Си Цзинпин Пекинда Александр Лукашенко билан учрашди

Хитой раиси Си Цзинпин 27 июнь куни Пекинда Россиянинг асосий иттифоқчиси бўлган Беларус етакчиси Александр Лукашенко билан учрашди.

Хитойнинг CCTV давлат телеканали хабарига кўра, Си Лукашенкони “Diaoyutay” давлат меҳмонхонасининг ҳашаматли биносида қабул қилган, бироқ ҳозирча қўшимча тафсилотлар келтирилмаган.

1994 йилдан бери ҳокимият тепасидан тушмай келаётган Лукашенко 2022 йилда Москвага Беларус ҳудуди орқали Украинага бостириб киришга рухсат берган, аммо урушга бевосита аралашмаслигини таъкидлаган.

НАТОнинг шарқий уфқи билан чегарадош бўлган Беларусда Россиянинг ядровий каллакка эга энг сўнгги “Орешник” ракетаси жойлаштирилган.

Айни пайтда Киев иттифоқчилари Пекинни узоқ вақтдан бери Москвага яширинча ёрдам бераётганликда айблаб келса-да, Хитой можаро давомида ўзини бетараф томон сифатида кўрсатмоқда.

Хитой Беларус миллий суверенитетини қўллаб-қувватлайди

Reuters нашрининг ёзишича, Си Цзинпин Лукашенкога Хитой Беларуснинг миллий суверенитети, мустақиллиги ва ҳудудий яхлитлигини ҳимоя қилиш борасида кўмакка тайёрлигини айтган.

Учрашув Беларус ва Украина ўртасида зиддият кучайиб бораётган бир пайтда юз берди.

Володимир Зеленскийнинг фикрича, Путин Лукашенкони Украинадаги урушда Россияни қўллаб-қувватлашни кучайтиришга ундамоқда.

Си эса Хитой ва Беларус стратегик алоқани сақлаб туриши ҳамда ривожлантириши лозимлигини таъкидлаган.

Шунингдек, Си Хитой Беларуснинг ривожланиши ва бунёдкорлик ишлари учун имкониятлари доирасида ёрдам беришга тайёрлигини билдирди.

“Хитой-Беларус муносабатлари ўзининг “тарихий чўққиси”га чиқди”, — деб хабар берди Беларус президентининг “Пул Первого” номли Telegram канали.