Ўзбекистон Ташқи ишлар вазири Беларусга илк расмий ташриф билан борди

А. Лукашенко Ўзбекистонга Беларусни Шанхай ҳамкорлик ташкилотига (ШҲТ) аъзолик йўлида қўллаб-қувватлаётгани учун миннатдорлик билдирди. Шунингдек, аввалроқ келишилган қўшма корхоналар ташкил этиш масаласига ҳам тўхталиб ўтди. "Биз ўшанда БелАЗ ва   бошқалар ҳақида гаплашган эдик. Шу йўналишда жиддий ишлайлик. Биз бундан манфаатдормиз. Ўзбекистонга таклиф қиладиган нарсамиз бор", - деди Беларус президенти.

Ўз навбатида, Беларус Ташқи ишлар вазирлиги раҳбари Сергей Алейник Б. Саидов билан музокаралар чоғида Беларус Ўзбекистон билан барча соҳаларда ҳамкорликнинг юқори динамикасини сақлаб қолишга қаратилганини таъкидлади. Томонлар Ўзбекистонда Беларус техникаларини ишлаб чиқаришни маҳаллийлаштириш бўйича ишларни давом эттиришни муҳокама қилдилар ва биргаликда тракторларни йиғиш, самосваллар, махсус техника йиғишни маҳаллийлаштириш, шунингдек, бир қатор бошқа қўшма ишлаб чиқаришларни йўлга қўйиш имкониятларини кўриб чиқдилар.

Бундан ташқари, вазирлар халқаро транспорт коридорлари ва янги логистика йўналишларини ривожлантириш, учинчи давлатлар бозорларида ҳамкорликда ишлаш истиқболларини муҳокама қилдилар. Таълим, фан, маданият, спорт ва туризм соҳаларида ўзаро ҳамкорликни, ёшлар ташкилотлари орқали алоқаларни янада кенгайтиришдан манфаатдор эканликларини тасдиқладилар.

С. Алейник ўзаро товар айирбошлаш ҳажми барқарор ўсиб бораётганига эътибор қаратди: “Сўнгги тўрт йилда товар айирбошлаш ҳажми 2,5 баробар ўсди. Бу ижобий тенденция жорий йилда ҳам давом этмоқда, дастлабки икки ойда ўсиш кузатилди, 7,5 фоизга яқин”.

Беларус ташқи ишлар вазирлиги раҳбарининг сўзларига кўра, икки давлат халқаро ташкилотлар ва БМТ доирасида фаол ҳамкорлик қилмоқда. “Биз ШҲТ доирасидаги ҳамкорликни давом эттиришни интиқлик билан кутамиз ва Беларуснинг унга аъзо бўлиш ҳақидаги аризасини қўллаб-қувватлаганидан миннатдормиз”, — дея қўшимча қилди С. Алейник.