Oʻzbekiston Tashqi ishlar vaziri Belarusga ilk rasmiy tashrif bilan bordi

A. Lukashenko Oʻzbekistonga Belarusni Shanxay hamkorlik tashkilotiga (ShHT) aʼzolik yoʻlida qoʻllab-quvvatlayotgani uchun minnatdorlik bildirdi. Shuningdek, avvalroq kelishilgan qoʻshma korxonalar tashkil etish masalasiga ham toʻxtalib oʻtdi. "Biz oʻshanda BelAZ va   boshqalar haqida gaplashgan edik. Shu yoʻnalishda jiddiy ishlaylik. Biz bundan manfaatdormiz. Oʻzbekistonga taklif qiladigan narsamiz bor", - dedi Belarus prezidenti.

Oʻz navbatida, Belarus Tashqi ishlar vazirligi rahbari Sergey Aleynik B. Saidov bilan muzokaralar chogʻida Belarus Oʻzbekiston bilan barcha sohalarda hamkorlikning yuqori dinamikasini saqlab qolishga qaratilganini taʼkidladi. Tomonlar Oʻzbekistonda Belarus texnikalarini ishlab chiqarishni mahalliylashtirish boʻyicha ishlarni davom ettirishni muhokama qildilar va birgalikda traktorlarni yigʻish, samosvallar, maxsus texnika yigʻishni mahalliylashtirish, shuningdek, bir qator boshqa qoʻshma ishlab chiqarishlarni yoʻlga qoʻyish imkoniyatlarini koʻrib chiqdilar.

Bundan tashqari, vazirlar xalqaro transport koridorlari va yangi logistika yoʻnalishlarini rivojlantirish, uchinchi davlatlar bozorlarida hamkorlikda ishlash istiqbollarini muhokama qildilar. Taʼlim, fan, madaniyat, sport va turizm sohalarida oʻzaro hamkorlikni, yoshlar tashkilotlari orqali aloqalarni yanada kengaytirishdan manfaatdor ekanliklarini tasdiqladilar.

S. Aleynik oʻzaro tovar ayirboshlash hajmi barqaror oʻsib borayotganiga eʼtibor qaratdi: “Soʻnggi toʻrt yilda tovar ayirboshlash hajmi 2,5 barobar oʻsdi. Bu ijobiy tendensiya joriy yilda ham davom etmoqda, dastlabki ikki oyda oʻsish kuzatildi, 7,5 foizga yaqin”.

Belarus tashqi ishlar vazirligi rahbarining soʻzlariga koʻra, ikki davlat xalqaro tashkilotlar va BMT doirasida faol hamkorlik qilmoqda. “Biz ShHT doirasidagi hamkorlikni davom ettirishni intiqlik bilan kutamiz va Belarusning unga aʼzo boʻlish haqidagi arizasini qoʻllab-quvvatlaganidan minnatdormiz”, — deya qoʻshimcha qildi S. Aleynik.