Ўзбекистон "Ягона Хитой" тамойилига амал қилади

Шанхай ҳамкорлик ташкилоти (ШҲТ)га аъзо давлатлар ташқи ишлар вазирлари кенгаши йиғилиши арафасида Хитой ташқи ишлар вазири Ван И ва Ўзбекистон ташқи ишлар вазири Бахтиёр Саидов 23-июл куни кечқурун Қирғизистонда учрашди.

Хитой Коммунистик партияси Марказий қўмитаси Сиёсий бюроси аъзоси ҳам бўлган Ван И учрашув мобайнида қуйидагиларни таъкидлади:

• Жорий йил Хитой ва Ўзбекистон ўртасида ҳар томонлама стратегик шериклик ўрнатилганига 10 йил тўлди.
• Жорий йил Ўзбекистон мустақиллигининг 35 йиллиги нишонланаётганини қайд этиб, президент Шавкат Мирзиёев раҳбарлигида мамлакат тараққиёти бардавомлигига ишонч билдирди.
• Хитой Ўзбекистоннинг миллий шароитларига мос тараққиёт йўлини қатъий қўллаб-қувватлашини, ўз ўрнида Тошкент ҳам Пекин манфаатларига дахлдор масалаларда Хитой тарафдори бўлишига ишонишини айтди.
• Хитой “Хитой–Қирғизистон–Ўзбекистон темир йўли” лойиҳасини амалга ошириш ҳамда янги саноатлаштириш лойиҳаларини ҳаётга татбиқ этишга тайёр.
• Хитой ривожланаётган мамлакатларнинг сунъий интеллект соҳасидаги салоҳиятини ошириш ва модернизациясини дастаклаш мақсадида Жаҳон сунъий интеллект ҳамкорлиги ташкилотини тузиш ташаббуси билан чиқди. Ўзбекистон эса ушбу тузилманинг таъсисчи аъзоларидан бирига айлангани билан табриклади.
• Хитой–Ўзбекистон ҳуқуқни муҳофаза қилиш ва хавфсизлик соҳасидаги ҳамкорлик механизмидаан самарали фойдаланиб, “уч ёвуз куч” – терроризм, экстремизм ва сепаратизмга, шунингдек трансмиллий уюшган жиноятчиликка қарши биргаликда курашиши лозим.

Бахтиёр Саидов ҳам бир қатор эътирофлар ва ҳамкасбининг фикрларига муносабат билдирди:

• Ўзбекистон Хитой билан ҳамкорликни юксак қадрлайди ва муносабатларни ривожлантириш мамлакат ташқи сиёсатининг устувор йўналишларидан бири бўлиб қолмоқда.
• Хитой Коммунистик партияси ташкил этилганининг 105 йиллиги муносабати билан табрик йўллаб, партия ташкил топганидан буён халққа хизмат қилиш тамойилига содиқ қолганини ва Хитойни улкан тараққиёт сари етаклаганини қайд этди.
• Ўзбекистон Хитойнинг давлат бошқаруви тажрибасини ўрганишга, “Ўзбекистон–2030” стратегиясини “Бир макон, бир йўл” ташаббуси билан уйғунлаштиришга ҳамда ўз тараққиёти ва модернизациясини жадаллаштиришга тайёрлигини таъкидлади.
• Ўзбекистон “Ягона Хитой” тамойилига амал қилишини, Хитой суверенитети ва ҳудудий яхлитлигига путур етказадиган ҳар қандай ҳаракатларга қарши эканини маълум қилди.
• Икки давлат ўртасидаги алоқаларни кенгайтириш, савдо, инвестиция, энергетика, стратегик фойдали қазилмалар ва рақамли иқтисодиёт соҳаларидаги амалий ҳамкорликни чуқурлаштириш, “уч ёвуз куч”га қарши биргаликда курашиш ҳамда ҳудудлараро ҳамкорлик имкониятидан самарали фойдаланишга тайёрлигини билдирди.

Шанхай ҳамкорлик ташкилоти Хитой, Россия, Ҳиндистон, Покистон ва Марказий Осиё давлатлари каби 10 та аъзони ўз ичига олган Евросиё гуруҳидир.