Петербургда ўзбек мигрантлар энди курьерлик қилолмайди

«Самокат» ва «Яндекс Еда» етказиб бериш хизматлари иловаларида мигрантлар учун фойдаланиш имконияти ёпилди. Энди улар сменага чиқолмайди ва буюртма қабул қила олмайди. Бу чеклов ЕОИИ (Евроосиё иқтисодий иттифоқи) аъзолари — Қозоғистон, Беларусь ва Арманистон фуқароларига татбиқ этилмайди, чунки улар Россия ҳудудида патентсиз ишлаш ҳуқуқига эга.

Санкт-Петербург губернатори Александр Беглов август ойида имзолаган мазкур қарор расмий изоҳга кўра, “яширин бандликка қарши кураш, хизматлар хавфсизлиги ва сифатига эътиборни ошириш ҳамда россиялик ёшлар учун иш ўринлари яратиш” мақсадида қабул қилинган.

Бироқ таҳлилчилар фикрича, бу қарорнинг илдизи фақат иқтисодий ёки маъмурий эмас. Россияда 2025 йил бошидан буён миграция сиёсати сезиларли даражада қаттиқлашди. Бунинг сабаби — жамиятда бегона ишчи кучига бўлган муносабатнинг кескин ўзгариши, айниқса, ижтимоий тармоқларда мигрантлар билан боғлиқ можаролар сонининг кўпайиши билан изоҳланади.

Петербургда етказиб бериш соҳаси асосан мигрантлар меҳнатига таянган эди. Расмий маълумотларга кўра, шаҳарда курьерларнинг 60–70 фоизи хорижий фуқаролар бўлган. Уларнинг ишдан четлатилиши қисқа муддатда хизмат кўрсатиш тезлиги ва логистика тизими самарадорлигига таъсир қилиши мумкин.

Айрим компаниялар илгари Россия фуқаролари бу соҳада ишлашга қизиқмаслигини айтиб, “ёшлар барқарорликсиз ва хавфли ишни танламайди”, деган фикрни билдиришган. Энди эса етказиб бериш хизматлари ички бозорда кадр топишда қийинчиликка дуч келиши эҳтимолдан холи эмас.

Сўнгги икки йилда Россия ҳудудида такси, қурилиш ва умумий овқатланиш соҳаларида ҳам мигрантларга нисбатан янги қоидалар жорий этилди. Бу сиёсат мамлакатда “меҳнат бозорини маҳаллий аҳоли фойдасига қайта тақсимлаш” стратегиясининг бир қисми сифатида кўрилаяпти.

Баъзи мутахассислар бу йўналишни «қисқа муддатли сиёсий ҳаракат» деб баҳоласа, бошқалар уни «Россиянинг ички меҳнат бозорини муҳофаза қилиш» сиёсати деб қўллаб-қувватламоқда.

Петербургда хорижий курьерлар фаолиятини чеклаш — бу фақат шаҳар миқёсидаги қарор эмас, балки Россиянинг умумий миграция сиёсатидаги янги босқичдир. У ижтимоий хавфсизликни таъминлаш, хизматлар сифатини ошириш ва маҳаллий аҳолининг ишга жалб этилишини рағбатлантириш мақсадини кўзлайди. Бироқ, бу қарорнинг иқтисодий натижалари — логистика тизимидаги издан чиқишлар ва етказиб бериш хизматларининг секинлашиши — яқин ойларда ўзини сездиради.