Россияни ким ўзгартириши мумкин?

The Economist ёзишича, Россиянинг энг йирик саноатчиларидан бири ва ўғит ишлаб чиқариш соҳасидаги миллиардер Андрей Мелниченко илк бор очиқ чиқиш қилиб, мамлакат чуқур боши берк кўчага кириб бораётганидан огоҳлантирди. У Путинга мухолиф эмас, аксинча уруш иқтисодиётидан фойда кўрган тадбиркорлардан бири. Шу боис унинг баёноти Россия элитасидаги кайфият ўзгараётганининг муҳим белгиси сифатида баҳоланмоқда.

Қайд этилишича, урушнинг оқибатлари энди оддий россияликлар ҳаётида ҳам яққол сезила бошлаган. Ёқилғи танқислиги, Украинанинг дрон ҳужумлари, мажбурий сафарбарлик ва иқтисодий босим жамиятдаги норозиликни аста-секин кучайтирмоқда. Бу ҳолат Кремлни урушни янада кучайтириш ёки ички босимни оширишга ундаши мумкин.

Нашрнинг таъкидлашича, Мелниченко Россия олдида бир неча хавфли сценарийни кўрмоқда. Унга кўра, мамлакат узоқ давом этадиган инқирозга ботиши, тобора Хитойга қарам бўлиб қолиши ёки Шимолий Кореяга ўхшаш ёпиқ давлатга айланиши мумкин. Бундай йўл на Россия, на қўшни давлатлар учун ижобий натижа бермайди.

Мақолада таъкидланишича, Мелниченко аниқ сиёсий ислоҳотлар режасини таклиф қилмаяпти. Аммо у Россия бир кишига таянадиган бошқарув тизимидан воз кечиб, янада барқарор ва олдиндан прогноз қилинадиган давлатга айланиши зарурлигини уқтиради. Нашр бу фикрни 1905 йилги Россия-Япония урушидан кейинги ислоҳотларга қиёслади.