Шавкат Мирзиёев Сербияга жўнаб кетди

Ташриф кун тартибида — савдо, инвестиция ва қўшма лойиҳалар

Ўзбекистон Президентининг Сербияга ташрифи дастурида савдо-иқтисодий ва инвестициявий ҳамкорликни кенгайтиришга алоҳида эътибор қаратилган.

Расмий маълумотларга кўра, музокараларда транспорт, машинасозлик, енгил ва озиқ-овқат саноати, қишлоқ хўжалиги, фармацевтика ҳамда ахборот технологиялари соҳаларида қўшма лойиҳаларни амалга ошириш масалалари муҳокама қилинади. Шунингдек, ташкиллаштирилган меҳнат миграцияси, минтақалараро алоқалар, маданий-гуманитар ва бошқа йўналишларда ҳамкорликни кенгайтириш режалаштирилган.

2025 йилдаги тарихий ташриф янги босқич учун замин яратди

Бугунги ташрифни 2025 йил октябрь ойидаги муҳим воқеалардан алоҳида кўриб бўлмайди.

2025 йил 28 октябрь куни Ўзбекистонга расмий ташриф буюрган Сербия Президенти Александр Вучич билан Шавкат Мирзиёев ўртасида Тошкентда музокаралар ўтказилган эди. Ўзбекистон Президентининг расмий маълумотига кўра, бу икки давлат ҳамкорлиги тарихидаги биринчи саммит бўлган. Томонлар муносабатларни сифат жиҳатидан янги босқичга олиб чиқишга келишиб олган эди.

Бу ташрифдан қандай натижалар кутилади?

Расмий маълумотларга кўра, ташриф якунида ҳукуматлараро ва идоралараро ҳужжатларнинг салмоқли тўпламини қабул қилиш кутилмоқда.

Муаллиф: Ҳасанбой ОЧУН