Саида Мирзиёева дипломатик ваколатхоналар фаолиятини таҳлил қилади

Қайд этилишича, сўнгги йилларда олий даражадаги 52 та ташриф доирасида 213 миллиард долларлик 1 617 та инвестиция лойиҳаси бўйича келишувларга эришилган. Бироқ уларнинг амалга оширилишини назорат қилишда камчиликлар мавжуд.

Шу муносабат билан инвестиция лойиҳалари бўйича “йўл хариталари”ни Ҳисоб палатаси ва Ташқи ишлар вазирлиги юритиши белгиланди. Бош вазирга эса ҳар ҳафта тармоқ раҳбарлари, ҳокимлар ва элчилар иштирокида давлатлар кесимида ҳар бир лойиҳани муҳокама қилиш топширилди.

Йиғилишда айрим дипломатик ваколатхоналар фаолияти ҳам кескин танқид қилинди. Беларусдаги элчи инвестиция ва ташқи савдо масалаларига етарлича эътибор қаратмагани учун лавозимидан озод этилгани айтилди. Шунингдек, Франция, Австрия, Испания, Италия, Ўмон, Индонезия, Малайзия ва Сингапурдаги элчилар фаолияти ҳам қониқарли эмаслиги қайд этилди.

Президент Администрацияси раҳбари Саида Мирзиёевага махсус комиссия тузиб, иқтисодий дипломатия, инвестиция ва экспорт йўналишлари бўйича дипломатик ваколатхоналар фаолиятини таҳлил қилиш ҳамда ўз вазифасини самарали бажармаётган ходимлар ўрнига ёш ва замонавий фикрлайдиган кадрлар бўйича таклифлар киритиш топширилди.