«Уни бермаймиз». Лукашенко Бакиев Қирғизистонга бормаслигини айтди

Беларус раҳбари 27 ноябрь куни Бишкекда журналистлар билан суҳбатда Бакиевнинг ҳаёти ҳақида гапирди. «БелТА»нинг хабар беришича, Лукашенко собиқ давлат раҳбарининг Қирғизистонга қайтишига йўл қўймаслигини таъкидлади.

«Бакиев яхши яшаяпти. Нормал. Биз уни сизларга ечиб бермаймиз энди. Унга айтдим: “Ҳеч қандай сафарлар бўлмайди, бас! Беларусда яшайвер”. У таклиф қилса, баъзида уникига меҳмонга бораман. Шу боис биз уни сизларга бермаймиз», — деди Лукашенко.

Лукашенконнинг айтишича, Бакиев ватанини соғинган, хотиржам бўлса ҳам отасининг қабрини бир марта бўлса ҳам зиёрат қилишни орзу қилади. 

Беларус раҳбари Қирғизистон ҳукуматининг бу имкониятни бермаётганини «бемаънилик» деб баҳолади.

«Ўйлайманки, бу масалани ҳозирги раҳбарият билан ҳал қиламиз», — дея қўшимча қилди у.

Эслатиб ўтамиз, Қурманбек Бакиев 2014 йилда 2010 йил апрелида Бишкекда намойишчилар отилишига оид иш бўйича ҳукм қилиниб, умрбод озодликдан маҳрум этилган. 2016 йилда жазо муддати 30 йилга қайта кўриб чиқилган. 2023 йил ёзида Қирғизистон Олий суди уни Кумтор кон соҳасидаги коррупция иши бўйича яна бир бор ҳукм қилган.

Аввалроқ Бакиев ҳукмлар бекор қилинган тақдирда Қирғизистонга қайтиш истагини билдиргани хабар қилинган. Уни ҳимоя қилаётган адвокат Икрамиддин Айткуловнинг айтишича, Олий суд аризни кўриб чиқишга қабул қилган, Бакиев эса айбни тан олмаяпти ва очиқ суд мажлисида иштирок этишга тайёр.