Россиянинг Киевга ҳаво ҳужумларида уч киши ҳалок бўлди

Украинанинг Киев шаҳри ва унинг атрофида Россия томонидан амалга оширилган ҳаво ҳужумлари оқибатида уч киши, жумладан бир нафар бола ҳалок бўлди. Яна етти киши жароҳат олган. Бу ҳақда Reuters Украина расмийларига таяниб хабар берди.

Киев шаҳар ҳарбий маъмурияти маълум қилишича, пойтахтнинг ўзида икки киши ҳалок бўлган, тўрт кишМи жароҳатланган. Шаҳарнинг айрим ҳудудларида зарбалар оқибатида ёнғинлар келиб чиққан. Хусусий уйлар, дўкон ва омбор бинолари зарарланган.

Киев вилояти губернатори Тимур Ткаченконинг билдиришича, вилоят ҳудудига Россия ракета ва дронлар орқали зарба берган. Натижада бир нафар бола ҳалок бўлган, яна уч киши жароҳатланган. Инфратузилма объектлари, уйлар, омборлар ва автомобилларга ҳам зарар етган.

Reuters мухбири Киевда портлашлар овозини эшитганини хабар қилган. Украина расмийларининг маълумотларига кўра, ҳужумлар давомида фуқаролик инфратузилмасига ҳам зарар етказилган.

Ҳаводан ҳужумлар хавфи туфайли Украинага қўшни Румыния ва Польша ўз ҳаво ҳудудларини ҳимоя қилиш мақсадида ҳарбий самолётларини ҳавога кўтарган. Бу ҳақда икки давлатнинг мудофаа идоралари ва қуролли кучлари маълумот берган.

Шу билан бирга, Россиянинг Самара вилоятида Украина дронлари ҳужум қилгани ҳақида ҳам хабар берилди. Вилоят губернатори Вячеслав Фёдоровнинг айтишича, ҳужум оқибатида хусусий уйларга зарар етган.

Reuters ушбу хабарларни мустақил равишда тасдиқлай олмаганини қайд этган.

Муаллиф: Ҳасанбой ОЧУН