Endi Jahon chempionatida 64 ta jamoa ishtirok etadimi?

FIFA prezidenti Janni Infantinoning aytishicha, bu yilgi turnirdan so‘ng jahon chempionatida ishtirok etuvchi jamoalar sonini 64 taga yetkazish masalasi muhokama qilinadi.

Kanada, Meksika va AQSHda bo‘lib o‘tayotgan 2026-yilgi final bosqichida ilk bor 48 ta jamoa ishtirok etmoqda.

Dastavval bu qaror qabul qilinganida  keskin tanqidlarga uchragan edi, biroq 11-iyunda musobaqa boshlanganidan beri jamoalar soni bo‘yicha jiddiy bahs-munozaralar bo‘lmadi.

“Jahon chempionati butun dunyo uchun bo‘lishi kerak”

Jamoalar sonini 32 tadan kengaytirishga erishgan Infantino Shveytsariyaning “Blue Sport” telekanaliga bergan intervyusida shunday dedi:

“Nazarimda, Jahon chempionatini faqatgina, Yevropa va Janubiy Amerika uchun emas, balki butun dunyo uchun qilish kerak. Har bir xalq Jahon chempionatida ishtirok etish imkoniyatiga ega bo‘lishi lozim. Ko‘rib turganingizdek, jamoalarning saviyasi nihoyatda yuqori va bu ko‘rsatkich butun dunyoda tobora ortmoqda”.

Infantinoning fikricha, agar kichikroq mamlakatlarga Jahon chempionatida qatnashish imkoni berilmasa, ularda rivojlanish uchun rag‘bat yo‘qoladi.

48 jamoalik format o‘zini oqladi

FIFA prezidenti 48 jamoalik turnirni muvaffaqiyatli o‘tmoqda deb baholab, har bir jamoa yuqori darajada to‘p surgani, barcha qit’a jamoalari gol urgani va kamida bittadan ochko ishlaganini ta’kidladi.

"O‘nta Afrika jamoasidan to‘qqiztasi pley-off bosqichiga chiqdi. O‘tgan Jahon chempionatida esa Afrikadan bor-yo‘g‘i beshta jamoa qatnashgan edi. Ushbu natijalar barcha jamoalarni qamrab olish, ularga ishtirok etish imkoniyatini berish naqadar muhim ekanini yaqqol ko‘rsatmoqda", — deya qo‘shimcha qildi Infantino.

Jahon chempionatida ishtirok etuvchi jamoalar soni 1998-yilda 32 taga yetkazilgan.

2030-yilgi navbatdagi final bosqichi Marokash, Portugaliya va Ispaniya hamkorligida o‘tkazilsa, 2034-yilgi turnirga Saudiya Arabistoni mezbonlik qiladi.