Ливияда футбол клубига илк бор аёл киши раҳбар бўлди

Интисор Шаниб шарқий Ливиянинг Дерна шаҳрида жойлашган машҳур “Darnes” футбол клуби президенти бўлди. Бошқа даъвогарлар унинг фойдасига ўз номзодини қайтариб олди. Шаниб бу воқеани “барча Ливия аёллари учун энг катта ютуқ” деб атади.

Душанба куни клуб бош ассамблеяси президенти вазифасини бажарувчи Муҳаммад Абдул-Аътий “Reuters” ахборот агентлигига уч нафар рақиб номзод Шанибнинг ягона номзод сифатида қаршиликларсиз сайланишига рози бўлганини маълум қилди.

Шаниб Дерна шаҳри депутати ҳамда Вакиллар палатасининг Хотин-қизлар ва болалар масалалари қўмитаси раиси ҳисобланиб, яқин икки ҳафта ичида янги лавозимига киришади.

Шаниб вазифа осон бўлмаса-да, ушбу лавозимни аёл киши эгаллаётгани ҳар қандай ливиялик аёл учун ҳам шараф эканини айтди.

“Мен ливиялик аёллар “Darnes” клуби мухлисларига нимадир бера олишини исботламоқчиман”, — дея қўшимча қилди у.

Шанибнинг болалик даврларидан “Darnes” билан алоқаси мавжуд – унинг акаси ва амакиси ушбу клубда тўп сурган.

У ўзининг тайинланиши танқидсиз кечмаслигини ҳам тан олди.

“Қандай қилиб аёл киши бу лавозимни эгаллаши мумкин, деган ҳасадли савол ҳам бор. Нафақат спорт клублари, балки аёллар бошқараётган мамлакатлар ҳам мавжуд. Раҳбарлик аёл ёки эркак бошқариши билан эмас, балки малака ва қобилият билан ўлчанади”, – деди Шаниб.

Cпортдаги eтакчи раҳбар аёллар

Ҳанан Ал-Қураши — 2023 йил июнь ойида Саудия Арабистонидаги Тоиф шаҳрининг “Vej” спорт клуб президенти этиб тайинланган биринчи аёл бўлди. Кейинги йили эса бу лавозимни Абдуллоҳ Ас-Саати эгаллади.

Аниша Муҳоози — 2018 йилдан бери Угандадаги “Kampala Capital City Authority” клубининг бош директори бўлиб ишлайди. Ушбу клуб мамлакатда пешқадамлардан бири ҳисобланади.

Дорис Петра — 2021 йилдан 2025 йилгача Кения футбол федерацияси вице-президенти лавозимини эгаллаган.

Канизат Иброҳим — 2021 йилда Африка футболининг бошқарув органи — CAF Ижроия қўмитасига сайланди, сўнгра CAFнинг 5-вице-президенти этиб тайинланди. Ҳозирда Канизат Иброҳим FIFA кенгаши аъзосидир.

Клаудия Ритсо — Италияда “Ternana Calcio” клубини бошқариб, Италия клубларининг энг ёш ва саноқли аёл президентларидан бири сифатида оммавий ахборот воситалари эътиборига тушди. У ўтган йилнинг сентябрь ойида, 23 ёшида клубнинг бир асрлик тарихидаги энг ёш ва биринчи аёл президент сифатида тайинланиб, тарихга кирган.