ЖЧ чипта ва формалари бўйича саволлар очиқ қолмоқда: ЎФА ва вазирлик нима деди?

Paradigma.uz таҳририяти АҚШда бўлиб ўтган Ўзбекистон миллий терма жамоаси ўйинлари учун ажратилган чипталар ҳамда расмий терма жамоа формалари тақсимоти бўйича Спорт вазирлиги ва Ўзбекистон футбол ассоциациясига расмий ахборот сўровлари юборганини маълум қилди.

Ижтимоий тармоқларда чипталар ва формаларнинг учинчи шахсларга берилгани ёки сотилгани ҳақида турли хабарлар тарқалган. Шу муносабат билан мазкур жараённинг қандай ташкил этилганига аниқлик киритиш мақсадида таҳририят томонидан давлат идораларидан расмий изоҳ сўралган эди.

Спорт вазирлиги жавобида Ўзбекистон футбол ассоциацияси тизимида мухлислар билан ишлаш бўйича мутахассис фаолият юритиши, ҳар бир гуруҳ босқичи учрашуви учун марказлашган мухлислар жамоасига 100 тадан иккинчи тоифали чипта ажратилганини маълум қилди.

Шунингдек, вазирлик маълумотига кўра, ФИФА томонидан Ўзбекистон мухлислари учун жами 14073 та фан-сектор чиптаси ажратилган. Уларнинг 8064 таси мухлислар томонидан ФИФА платформаси орқали тўғридан-тўғри сотиб олинган, 6009 таси эса турли давлат ва спорт ташкилотлари, профессионал клублар, ҳомийлар, марказлашган мухлислар жамоаси ҳамда АҚШдаги "Mahalla USA" ташкилоти учун ажратилган.

Ўзбекистон футбол ассоциацияси ҳам чипталар ФИФА белгилаган расмий нархларда тарқатилганини, уларни бошқа шахсга ўтказиш ёки қайта сотиш ФИФА қоидаларига мувофиқ амалга оширилишини, ассоциация эса бу жараённи чеклаш ваколатига эга эмаслигини билдирган.

Бироқ таҳририятга юборилган жавоблардан кейин ҳам бир қатор саволлар очиқ қолган.

Жумладан, марказлашган мухлислар жамоасининг ҳуқуқий мақоми, унинг қайси ҳужжат асосида ташкил этилгани, ички низоми ва аъзолик қоидалари ҳақида аниқ маълумот тақдим этилмаган.

Шунингдек, миллий терма жамоанинг расмий формалари қанча тайёрлангани, улар кимларга ва қандай тартибда тарқатилгани ҳақида ҳам жавоб берилмаган.

Таҳририят, шунингдек, 6 009 та чиптанинг қайси ташкилотларга қанчадан тақсимлангани, давлат идораларига квоталар қандай мезонлар асосида берилгани ҳамда "Mahalla USA" ташкилотига алоҳида квота ажратилиши сабаблари бўйича ҳам аниқ маълумот олинмаганини қайд этди.

Бундан ташқари, ижтимоий тармоқларда тарқалган хабарлар юзасидан хизмат текшируви ўтказилгани ёки ўтказилмагани, шунингдек ажратилган чипта ёки расмий форма бошқа шахсга берилган тақдирда қандай ички чоралар кўрилиши ҳақида ҳам расмий жавоб берилмаган.

Paradigma.uz ушбу мавзу бўйича қўшимча ахборот сўровлари юборишда ва масала юзасидан келадиган янги маълумотларни жамоатчиликка етказишда давом этади.