Liviyada futbol klubiga ilk bor ayol kishi rahbar bo‘ldi

Intisor Shanib sharqiy Liviyaning Derna shahrida joylashgan mashhur “Darnes” futbol klubi prezidenti bo‘ldi. Boshqa barcha da’vogarlar uning foydasiga o‘z nomzodini qaytarib oldi. Shanib bu voqeani “barcha Liviya ayollari uchun eng katta yutuq” deb atadi.

Dushanba kuni klub bosh assambleyasi prezidenti vazifasini bajaruvchi Muhammad Abdul-A’tiy “Reuters” axborot agentligiga uch nafar raqib nomzod Shanibning yagona nomzod sifatida qarshiliklarsiz saylanishiga rozi bo‘lganini ma’lum qildi.

Shanib Derna shahri deputati hamda Vakillar palatasining Xotin-qizlar va bolalar masalalari qo‘mitasi raisi hisoblanib, yaqin ikki hafta ichida yangi lavozimiga kirishadi.

Shaniy vazifa oson bo‘lmasa-da, ushbu lavozimni ayol kishi egallayotgani har qanday liviyalik ayol uchun ham sharaf ekanini aytdi.

“Men liviyalik ayollar “Darnes” klubi muxlislariga nimadir bera olishini isbotlamoqchiman”, — deya qo‘shimcha qildi u.

Shanibning bolalik davrlaridan “Darnes” bilan aloqasi mavjud – uning akasi va amakisi ushbu klubda to‘p surgan.

U o‘zining tayinlanishi tanqidsiz kechmasligini ham tan oldi.

“Qanday qilib ayol kishi bu lavozimni egallashi mumkin, degan hasadli savol ham bor. Nafaqat sport klublari, balki ayollar boshqarayotgan mamlakatlar ham mavjud. Rahbarlik ayol yoki erkak boshqarishi bilan emas, balki malaka va qobiliyat bilan o‘lchanadi”, – dedi Shahib.

Sportdagi yetakchi rahbar ayollar

Hanan Al-Qurashi — 2023-yil iyun oyida Saudiya Arabistonidagi Toif shahrining “Vej” sport klub prezidenti etib tayinlangan birinchi ayol bo‘ldi. Keyingi yili esa bu lavozimni Abdulloh As-Saati egalladi.

Anisha Muhoozi — 2018-yildan beri Ugandadagi “Kampala Capital City Authority” klubining bosh direktori bo‘lib ishlaydi. Ushbu klub mamlakatda peshqadamlardan biri hisoblanadi.

Doris Petra — 2021-yildan 2025-yilgacha Keniya futbol federatsiyasi vitse-prezidenti lavozimini egallagan.

Kanizat Ibrohim — 2021-yilda Afrika futbolining boshqaruv organi — CAF Ijroiya qo‘mitasiga saylandi, so‘ngra CAFning 5-vitse-prezidenti etib tayinlandi. Hozirda Kanizat Ibrohim FIFA kengashi a’zosidir.

Klaudiya Ritso — Italiyada “Ternana Calcio” klubini boshqarib, Italiya klublarining eng yosh va sanoqli ayol prezidentlaridan biri sifatida ommaviy axborot vositalari e’tiboriga tushdi. U o‘tgan yilning sentyabr oyida, 23 yoshida klubning bir asrlik tarixidagi eng yosh va birinchi ayol prezident sifatida tayinlanib, tarixga kirgan.