Нодирбек Абдусатторов Магнус Карлсенни мағлуб этди

Учрашувнинг биринчи баҳсида жаҳоннинг собиқ чемпиони Магнус Карлсен Нодирбек Абдусатторов устидан таъсирли услубда ғалаба қозонди. Бироқ жамоадошларининг муваффақиятли ўйини эвазига Ўзбекистон жамоаси умумий ҳисобда 3,5:2,5 натижа билан устун келди.

Шу боис иккинчи баҳсда WR Chess жамоасига фақат ғалаба керак эди.

Ҳал қилувчи партияда Карлсен таваккал қилиб, фигура қурбон қилди. Аммо Нодирбек Абдусатторов рақибини қийин вазиятга солиб қўйди.

Шундан кейин Карлсен адашиб юриб қўйди. Бу эса қора дона эгаларига устунлик берди ва Абдусатторов ортиқча фигура билан қолди.

Партия 52-юришда Нодирбекнинг ғалабаси билан якунланди.

Иккинчи баҳс 3:3 ҳисобида тугади. Натижада WR Chess мусобақани тарк этди, Ўзбекистон жамоаси эса ярим финалга чиқди.

Бу натижа жаҳон чемпионатида янги чемпион жамоа аниқланишини ҳам англатади. Чунки турнир фаворитларидан бири ҳисобланган WR Chess энди соврин учун курашни давом эттира олмайди.