Олимпиада кундалиги: Ўзбекистон ҳисобига иккита олтин медаль қўшилди

Шу куннинг ўзида баҳсларга киришган Токио Олимпиадаси чемпиони Улуғбек Рашидов -68 кг вазн тоифасида таэквондо бўйича мусобақа финалигача етиб келди. Ортда қолган баҳсларда рақибларидан яққол устун келган Рашидов учун финал жанги бироз қийин кечди. Шунга қарамай амалдаги Олимпиада чемпиони азалий рақиб Иордания вакили Заид Каримни мағлуб этиб, кетма-кет икки марта таэквондо бўйича Олимпиаданинг олтин медалини қўлга киритган илк ўзбек спортчиси бўлди. 

Бокс бўйича ўсмирлар Олимпиадаси ғолиби, жаҳон чемпиони Абдумалик Халоков Олимпиаданинг финал йўлланмаси учун -57 кг вазн тоифасида австралиялик Чарли Сениорга қарши рингга чиқди. Тажрибали боксчи Абдумалик 3 раундда баллар ҳисобига рақибидан устун келди ва финал йўлланмасини қўлга киритди. Унинг финал жанги 11 август куни Мунарбек Сейитбек ўғлига қарши бўлиб ўтади. 

Ўзбек бокси профессори, Рио Олимпиадаси чемпиони Ҳасанбой Дўсматов финал жангини ўтказди. Бу босқичда унга мезбон спортчи Билал Беннама рақиб бўлди. Ўта қизиқарли кечган баҳсда Ҳасанбой чинданам профессор эканлигини исботлаб, рақибини мағлуб этди ва олтин медални қўлга киритди. Бу натижаси билан у икки карра Олимпиада чемпиони бўлган илк ўзбек боксчиси номини олди. Ҳасанбойнинг финал жангини унинг оила аъзолари билан бир қаторда Андижон вилояти ҳокими Шуҳратдек Абдураҳмонов ва Булоқбоши тумани ҳокими Фурқатбек Бўтахоновлар бирга кузатди. 

Кўп кураш баҳсларида иштирокини бошлаган Тахмина Икромова саралаш босқичида 126 400 балл тўплади. Бу эса унга кейинги босқичга йўл олиш учун етарли бўлмади. Ўзбекистон терма жамоаси вакили Тахмина Икромова Олимпиадани 14-натижа билан якунлади. 

Бешкураш баҳсларида иштирок этаётган Алисе Фахрутдинова эса қиличбозлик бўйича кечган баҳсларда 220 балл тўплашга эришди ва якунда ярим финал йўлланмасини қўлга киритди. 

Эркин кураш бўйича баҳсларга киришган Ғуломжон Абдуллаев (-57 кг) ва Жавраил Шапиевлар ярим финалда рақибларига имкониятни бой берганига қарамай, Олимпиаданинг бронза медалини қўлга киритиш имкониятини сақлаб қолди. Энди улар ўтиш босқичида иштирок этади. 

Маълумот учун, медаллар рейтингида Ўзбекистон умумжамоа ҳисобида 3 та олтин 2 та бронза тўплаган ҳолда 18 ўринни эгаллаб турибди.