Шахмат Олимпиадасида Исроил терма жамоаси техник мағлубиятга учради

2026 йилги шахмат Олимпиадасида Исроилнинг эркаклар ва аёллар термалари 6-тур учрашувларида иштирок этмади. Бунга Йом-Киппур диний байрами муносабати билан ўйинлар вақтини ўзгартириш бўйича берилган сўров рад этилгани сабаб бўлди. Бу ҳақда "World Chess" хабар берди.

Самарқандда ўтказилаётган шахмат Олимпиадасининг 6-турида Исроилнинг эркаклар термаси Нидерландия, аёллар термаси эса Болгарияга қарши баҳс олиб бориши керак эди. Бироқ икки жамоа ҳам белгиланган вақтда ўйинга чиқмади.

Натижада Нидерландия эркаклар ўртасидаги баҳсда, Болгария эса аёллар ўртасидаги учрашувда 4:0 ҳисобида техник ғалаба қайд этди. Бу учрашувларда бирорта ҳам юриш амалга оширилмаган.

Исроил томони 6-тур учрашувларини Йом-Киппур муносабати билан ўзгартиришни сўраган. Жамоа баҳсларни 21 сентябрь куни маҳаллий вақт билан соат 19:30 дан кейин бошлаш ёки 22 сентябрь — Олимпиададаги дам олиш кунига кўчиришни таклиф қилган.

Жаҳон шахмат федерацияси (FIDE) ушбу таклифни Нидерландия ва Болгария томонига етказган. Бироқ икки жамоа ҳам белгиланган вақтни ўзгартиришга рози бўлмаган.
FIDE вакилига кўра, мусобақа қоидаларига асосан рақиб жамоалар бундай сўровни рад этиш ҳуқуқига эга.

5-турда вазият бошқача бўлган

Исроилнинг 5-турдаги учрашувлари эса диний маросимни ҳисобга олган ҳолда ўзгартирилган эди.

Ўша турда Исроилнинг эркаклар термаси Сингапур, аёллар термаси Колумбияга қарши ўйнаши керак бўлган. Сингапур ва Колумбия жамоалари Исроилнинг илтимосини қабул қилиб, учрашувларни белгиланган вақтдан 1 соат 15 дақиқа олдин бошлашга рози бўлган.

Баҳслар Самарқанддаги асосий Олимпиада майдони — Silk Road International Exhibition Centre ўрнига Savitsky Hotel'да ўтказилган. Бу Исроил шахматчиларининг Йом-Киппур бошланишидан олдин ўйинларни якунлашини таъминлаш учун амалга оширилган.

Бироқ 6-турда Нидерландия ва Болгария бундай ўзгаришга рози бўлмагани сабабли Исроил жамоалари учрашувларга келмаган.

Исроил учун Олимпиададаги яна бир техник мағлубият

Бу Исроил жамоалари билан боғлиқ Олимпиададаги биринчи техник мағлубият эмас.
Мусобақанинг 1-турида Покистон Исроилга қарши эркаклар ўртасидаги учрашувда майдонга чиқишдан бош тортган ва натижада Исроилга 4:0 ҳисобида техник ғалаба берилган эди.

6-турдаги ҳолат эса бошқача: Нидерландия ва Болгария белгиланган учрашувларни ўтказишга тайёр бўлган, аммо баҳс вақтини ўзгартириш бўйича Исроил сўровини қабул қилмаган.

2026 йилги шахмат Олимпиадаси 15–27 сентябрь кунлари Самарқандда ўтказилмоқда. Мусобақада 11 тур ўтказилади. 22 сентябрь дам олиш куни сифатида белгиланган.

Муаллиф: Ҳасанбой ОЧУН